Mekhaṭha Sakhaan Lak Kahdohnak Ah SAC Lei 16 An Thi Tiah KNU Nih A Thanh
The Chinland Post | 2023 March 31 — Thai le Myanmar ramri, Thanlwin tiva kam ah a um mi SAC Mekhaṭha sakhaan cu KNLA phufonh nih an lak i kahdohnak chung ah SAC lei 16 an thi tiah KNU nih a thanh.
SAC ralkap kut in KNLA nih March 28 ah an lak khawh ṭhan hi a si i min 45 tluk kahdohnak a ruah hnu ah SAC lei 16 an thi, 7 an i hliam i hliam a tuar mi chung in 7 hi Thai ram lei ah an zaam tiah theih a si.
Sakhaan lak kahdohnak chung in MA-1, MA-2, MA-4, RPG 7, 60MM, Machine Gun, Sniper tiah a zapi zuun 23 le kuan 3,360 leng ah pehtlaihnak seh 2, Walky Talky 2, Datkhe bawm 4, bawngbi 2 hna an lak khawh tiah theih a si.
KNLA phufonh lei in 1 a nunnak a liam i 8 an i hliam tiah an langhter.
Mekhaṭha sakhaan hi a hlan ah KNLA B20 hmunhma ah a rak si i 1995 ah KNU Headquaters-Maneplaw an sung hnu ah, SAC ralkap nih thazang tampi in a rak doh hna i a lak hnu ah hmunhma a khuarnak a si.
About The Author
