Milem Ai-awh Ah Khua Thanchonak Tuahpiak Dingin Thantlang Zatlaang Bu Nih Ramkulh Sipin Vuanci Zungah An Hal
Salai Elvis| 2018 April 19| Thantlang khuachung ah ks. sing 300 dih in pangpardum le Bogyoke milem tuahnak caah sipin nih budget a chiahmi cu khua thanchonak tuahpiak dingin Thantlang khua zatlaang bukip fonh in ramkulh sipin vuanci zung ah April 19 ah ca an chiah tiah thawng kan theih.
Ramkulh sipin minister sin ah ca an chiahmi cu; “Bogyoke milem cu Thantlang khuachung lamton hmun pakhat khat ah kan chiah lai tiah kan theihmi thanwgpang le milem sernak ding caah ks.sing 300 a dih dingmi ai-awh ah khuachung nih kan herh deuhmi lam, mei, ti le thianhlimhnak caah nan kan tuahpiak naklai, hi milem ser lo awk a tha lo nan ti si ah cun rian thok hlan ah “United Nations Declaration on the Rights of Indigenous Peoples (UNDRIP) poh-ma (19) le a tu kawlram nih hman lio mi tlangcung mi kilvennak upadi (2015) pohmah (5) ning in mizapi/khuapi lei chimhruahnak le hnatlaknak um hnu lawngah nan kan tuahpiak naklai kan in nawl hna” tiah ramkulh sipin Minister sin ah ca an pek hi a si.
Hi kong he pehtlai in tuanvo ngeitu pakhat a simi Salai Kep Chin Thang nih,“atu bantuk thil hi cu khuapi he aa pehtlaimi thil a si. Anmah sipin Committee zong mizapi nih thimmi an si bantuk in atu bantuk thil kongah cun mizapi sin ah chimhruahnak le hnatlaknak an lakpiak hna awk hrimhrim a si” tiah TCP ah a chim.
Atulio Chin ramkulh cu mizapi duhnak a hmaizahmi le a dirpitu NLD nih a hruaimi cozah a si bantuk in le Thantlang Sipin Committee zong mizapi thimmi aiawhtu an si bantuk in ramchung ramleng mi tampi nih kan duhnak kan langhtermi hi an kan ruahpiak lai kan i ruahchan ko ti zong a chim.
Milem ai-awh ah khua thanchonak tuahpiak ding le mizapi lei chimhruahnak le hnatlaknak laakpiak ding in Vuanci sin a haltu hi Thantlang Sianghleiruun Chungkhar (TSC), Thantlang Youth Association (TYA) le Chin Family Group an si. Hi bu pathum hi Thantlang khuachung zatlaang phu ah a nganbik le khua a huaptu bu an si tiah kan theih. +++
About The Author
