Min Aung Hliang nih a thli tein tuahmi meeting cazin (record) a thang

The Chinland Post | 2022 March 20 – Min Aung Hliang hruainak in February 14 Naypitaw ah a thli tein tuahmi meeting biaruahnak cazin (record) a leng ah a than caah Sagaing ramṭhen i  General Administration Department in riansang a tlaitu pakhat tlaih a tong tiah theih a si.

February 13 ah Min Aung Hliang nih hruaimi a thlithup meeting cazin (record) pawl cu Yangon Khit Thit nih  February 25 ah cazin vialte cu a langhter caah Yangon ramṭhen cozah,  E-government rianṭuantu pawl, Sagaing ramṭhen, Magway ramṭhen le Naypyidaw SAC zung i rianṭuantu cheukhat cu zarhkhat leng zohfelnak an tuah hna, Sagaing ramṭhen General Administration Department in riansang tlaitu pakhat an tlaih tiah theih a si.

“Min Aung Hliang le Chairman of the Regional Council meeting cazin cu Khit Thit ah nan kuat caah line cungah a rak lang tiah Sagaing ramṭhen General Administration officer pakhat an tlaih” tiah Sagaing ramṭhen riansang tlaitu pakhat nih a chim.

Cun, January 25 Naypyidaw ah daitein duhlo-langhternak (silent strike) kham ding ah Minister of Home Affairs Soe Htut nih a fialnak hna aww (audio file) cu Yangon Khit Thit thawngzamh sin ah a than ca zong ah meeting a kaimi Deputy Minister in a tang bik zung kip rianṭuantu vialte zohfelnak, Phone zohfelnak tiang ralkap nih an tuah.

“Minister nih zeiruangdah kan fialnak hna aww (audio file) a leng ah nan than ter tiah a kan hrocer. Cabuai cung catlap vialte zong a hlonh dih. Mah tiangtiang hi zeiruangdah a leng ah nan chuahter tiah a thinhung tuk. A him ti lo hih tiah an kan ngir dih” tiah Naypyidaw thawngzamh nih an langhter.

Minister of Home Affairs Soe Htut i a aww (audio record) cu March 14 ah Yangon Khit Thit nih mipi sin ah a langhter.

Meeting cazin vialte, raltuknak lei kong he pehtlai thil sining pawl a thannak kong he pehtlai in ṭha tein tawlrel ding, meeting room chungah hohmanh phone telh in electronic thliri pawl i put lo ding, Yangon Khit Thit thawngzamh sin ah SAC thiltuahmi pawl a than lengmang mi kong kherhhlai ding le Yangon Khit Thit thawngzamh cu tlaih le a ziizut ding tiah Minister of Home Affairs Soe Htut nih nawl a chuah.

Culawng siloin, thonghra ca le thongnga ca a deu pawl kong cu Yangon Khit Thit nih min langhter a duh lomi Central Bank riansang tlaitu pakhat charhchan in an langhter caah Central Bank nih a ziizut ding in Minister of Home Affairs cu ca a kuat tiah theih a si.

Ref: Khit Thit Media

Na ruahning rak langhter ve.. (Leave a comment)

%d bloggers like this: