Mindat khua ah SAC ralkap CDF-Mindat nih an kah hna

The Chinland Post | 2022 March 30 – Chin ramkulh, Mindat khua, Bawathit sang ah CDF-Mindat nih SAC ralkap cu March 29 zinglei ah an bawh (ambush) hna i SAC ralkap pahnih an thi tiah CDF-Mindat nih a thanh.

Mindat khua, Bawathit sang tikhor kam ah mi a ngiami ralkap pawl kan kah hna a si tiah CDF-Mindat in biachimnak nawl a ngeitu Ko Yaw Man nih RFA ah a chim.

“Zinglei sml 8:00am hrawngah khuachung bawathit sang tikhor pawngah mi a ngiami hna kan kah hna hi a si. SAC ralkap pahnih an thi, pahnih an i hliam. Kan bawmhmi hna (ambush) a si caah CDF-Mindat in a thimi kan um lo”.

Cu kahdohnak ruangah, a pawngkam hrawng mipi hna cu Myoma Baptist biakinn ah chikhat an i thup tiah khuami hna nih an chim.

Mindat khua ah SAC nih ralkap thazang a chap tuk caah kahdohnak a chuak ṭhan sual lai tiah thinphang in kan um ko tiah khuami hna nih an chim.

A luancia February 19 ah SAC ralkap le CDF-Mindat karlak ah kahdohnak a chuah caah khua 7 in mipi 300 leng cu an zaam tiah theih a si.

Na ruahning rak langhter ve.. (Leave a comment)

%d bloggers like this: