Mindat Khua Biaceihbawi, Upadi Bawi le Pengkomh Palek Bawi Cu Eihmuar Kongah Report An Tuah Hna

TCP-Thantlang| 2018 November 8| Chin ramkulh Mindat peng biaceih bawi, upadi bawi le pengkomh palek bawi hna cu eihmuar kongah Mindat khua zatlang bu 5 komh le ingtuartu chungkhar lei hna nih November 5 ah rampi eihmuar dohtu phu sin ah an report hna tiah theih a si.

A luancia 2017 kum lio ah Mindat sii-inn hmai ah U Om Ling Ngai le Thang Ki Hung motor Cycle an i pahnak kongah an i hmuthiam lo i U Om Ling Ngai cu thongthlak aa huah. U Om Ling Ngai cu upadi kongkau a theih lo tikah Mindat biaceih bawi U Htun Htun Naing nih tangka sing 2 (200,000), Upadi bawi pakhat a si mi U Aung Soe Thein nih sing 2 nih ahmuh (case) an buai lio ah an rak hal. Cun thonginn chung a um lio ah Mindat khuakomh palek bawi nih amah ca le a kut tang mi hna caah sing 34 (3,400,000) le Upadi bawi U Aung Soe Thein thiam nih sing 25 a hal than tiin Mindat khua zatlang bu komh hna nih rampi eihmuar dohtu Committee sin Report ca an tial mi chungah aa tial.

Third Eye phu a si mi Mang Om nih “a voi khatnak sing 2 cio an pek hna khawh in a ingtuar tu thong inn chungin caan karlak an chuah hnu ah an hal hi a si. A hnu ah sing 25 le sing 34 cu thong an thlak than in thonginn a um lio ah mi pahnih cu bawmh a hal hna i a va pekter hna. Cu caah upadi bawi, palek bawi le biaceih bawi hna nih an i lak ti kan hmuh hna. President zong nih eihmuar dohtu Committee hna hi a dirpi ko hna caah fakpi in dantatnak an kan tuahpiak lai zong ka zumh. Corruption a um caah Anti-corruption zong a um ve, a bik in Corruption hi kan doh mi cu a si” tiah a chim.

A tubantuk in a ingtuartu U Om Ling Ngai, CEA, MYA, CCWO, Third Eye le Lin-lat-cesin phu hna nih report an tuah hna hi a si.

Ref: Khonumthung

Na ruahning rak langhter ve.. (Leave a comment)

%d bloggers like this: