Mindat Khuachung Ah Ooredoo Tower Tung Phun An Timhmi Khuami Hna Lung Tling Lo

TCP-Online| 2018 September 1| Chin ramkulh Mindat khuachung ashihpin sang ah Ooredoo tower tung phun an timhmi cungah khuami an lung tling lo ti Mindat khuami Salai Sin Aung Leng nih a chim.

“Ooredoo tower tung hi phun hlah u tiah kan timi a si lo. An phun timhnak hi inn he aa neih tuk tikah mah hihi kan dohmi cu a si. Inn kam tuk in an phun timh tikah ngakchia ngamdamnak lei zong ah tih a nungmi a si. Company pawl kan rem lo zong a si lo. An phun timhnak hi inn he aa hlat deuh nakah thial hna sehlaw ti kan duhmi a si. Mah hihi Company nih an duh hlei lo ahcun cunglei tiang kan kalpi lai” tiah Salai Sin Aung Leng nih a chim.

Hi kongah hin khuabawi nih biaruah dingin Company, Tower phun timhnak inn ngeitu le khuami hna cu a sawm hna i biaruahnak tuah an tim. Nain, Company le Tower phun timhnak inn ngeitu hna cu an rak chuak duh lo tiah khuabawi Pu Naing Om nih a chim.

Pu Naing Om nih cun “ECO Company nih sipin EO sinin tower bunh khawh nak kan ngei tiah an chim. Kei nih cun sipin nih an in pekmi kha phungningte a si lo. Phungningte nan duh cun keimah khuabawi sinah nan ka hal ding si ti zong ka ti hna” tiah a chim.

Vawlei hmun ngeitu (inn ngeitu) le Company hna zong nih khuabawi sin halnak tuah loin phun an timhmi si tikah khuami minung 42 min thutnak in cunglei pengkomh zung ah ca an kuat hna ti kan theih.

Ref; Chin World

Na ruahning rak langhter ve.. (Leave a comment)

%d bloggers like this: