Mindat khuate hna ah SAC nih hriamngan in a kah

0

The Chinland Post | 2022 June 22 – Chin ramkulh, Mindat peng chungah SAC ralkap nih mipi pawl an umnak khuate hna ah hriamngan in a kah tawn tiah Mindat peng mipi uknak phu nih an chim.

June 20, zaan sml 10 ah Mindat khuachung ah a ummi SAC ralkap pawl cu Mindat nitlak lei Pukun khua ah hriamngan in voi 2 a kah i mipi inn cheukhat a rawk i khuami hna himnak hmun ah an zaam tiah CDF-Mindat nih a thanh.

Mindat mipi uknak phu in biachimnak nawl a ngeitu Ko Yaw Man nih SAC ralkap pawl cu June 15 thok in Mindat chaklei le thlanglei ah a ummi khuate hna ah hriamngan in an kah lengmang, June 16 zongah SAC ralkap nih kah ruangah chaklei Muitwe khuami 3 an thi i 3 an i hliam tiah The Irrawaddy ah a chim.

“Muitwe khua a kah lioah mi 3 an thi colh. A thla lawng a si rihmi hngakchia telh in minung 3 bom nih a khen hna i an i hliam. Mipi inn 20 a rawk. Inn 4 hi cu a rawh dan a fak tuk. Muitwe khua an kahmi hi cu khuachung tla hrimhrim ding in an i tinhmi a si. Tlanglo a ṭuanmi pawl thi dih hna seh tiah an kahmi a lo. Mindat ah a ummi SAC battalion 274 chungah 105 MM an chiah cu. Mah pawl khan kap sehlaw a lo”.

CDF Mindat nih Mindat khuachung ah SAC nih hmunhma an khuarnak 3 cu June 14 ah thazang tampi in phu 3 ṭhen in kahdohnak an tuah i bawmhnak pek ding in a raami pawl zong an kah chih hna.

Kahdohnak chungah SAC ralkap bawm ding in a raami pawl kha CDF- Mindat nih an bawh hna caah kahdohnak a hruaitu captain 1 a thih hnu ah SAC ralkap nih khuate lei ah hriamngan in a kah lengmang hi a si tiah Ko Yaw Man nih a chim.

“Kan theihmi thawngpang hi a fiang cu a si lo. Mah captain pa hi Mindat hmunhma a thei ngaimi a si tiah an chim. Lai le kawl cawhmi a si. Kanmah lei hmunhma umtu ning le lam pawl a fiang tuk. Mindat khuachung ralkap nih cun a mah an i bochan tuk. Captain a thih ruangah Mindat khuachung ah a ummi Colonel cu a thinhung lengmang. Ka bochantuk mi pa a thi cang tiah a rit hnu cun kap uh, a thimi thi hna seh tiah kah thlorh in a kah ter hna an ti. Voikhat kah ah voi 6, voi 7 hrawng an kah” tiah a chim.

SAC ralkap le CDF-Mindat karlak ah entainak a fak i khuachung ah SAC ralkap nih thazang 300 hrawng a chiah tiah Mindat mipi uknak phu sin in theih a si.

About The Author

Na ruahning rak langhter ve.. (Leave a comment)

%d bloggers like this: