Mindat Lei Panh In SAC Ralkap Motor A Rak Kai Mi Khamnak Caah Hlei An Puah
The Chinlandpost | October 5, 2023 — Magwe ramṭhen, Pakokku hrambunh LIB 101 hnulei ah a um mi, Chinramkulh, Mindat le Matupi ah riakcaw a phor mi motor 70 hrawng khamnak caah Pakokkku –Pauk peng karlak Ongtaw hlei cu an puah tiah theih a si.
Mah hlei hi September 30 le October 3 ah voihnih an puah cang tiah tualchung mipi ralkap nih an chim.
SAC ralkap 300 hrawng le riakcaw a phortu motor cu September 28 ah Pakokku in an rak i thawh hi a si.
Lampi ah kham a ton caah zarhkhat chung cu Pauk peng ah aa tang rih. Magwe hrambunh mipi ralkap he kahdohnak a chuak. SAC ralkap nih Pakokku-Pauk-Kyaukhtu-Mindat lampi hmang in Chin ramkulh thlanglei ah ralkap thazang a chap ṭhan lengmang.
2023 June 21 ah Pakokku in a rak chuak mi SAC ralkap mawṭaw 9 cu ralkap 100 hrawng nih himnak an lakpiak i Mindat-Kyaukhtu lei an panh caah cuka lamcung mipi hna nih ralrinnak ṭha tein rak ngei uh tiah CDF-Mindat nih an rak thanh.
June 21 ah cu SAC ralkap pawl cu phu 3 ṭhen in Kyaukhtu hmunhma chung ah an lut i lam kehlei le orhlei ah hriamngan an thlah thlorh, meithal an puah thlorh i hmai an fong thluahmah caah CDF phu hna nih cuka hmunhma khuami hna kha umkalnak tuah rih lo ding in ralrinnak an rak pek hna.
May 2022, Mindat-Matupi ah hriamnam, meithal, kuan, zen le riakcaw phortu motor runpi he an rak kai lio ah atu Ongtaw hlei cu bom in an hrawh bal cang tiah The Mindat Post sin in theih a si.
Photo/ Credit- the mindatpost- SAC ralkap motor run cu Yapia Ongtaw hlei nikum hmanthlak a si.
