Mindat Sipin Committee Chairman Pu Ta”m Lein Nih Sing 18 Ziknawh A Lak Tiin Hluttaw Ah An Report

0

Salai Ngun San Aung| 2018 July 23| Mindat sipin committee chairman Pu Ta’’m Lein cu Mang Ng’Thang Hnga nih rian soknak caah Myanmar tangka Sing 18 ziknawh a lak mi khirh than ding in ca a kuat i Mindat Hluttaw palai U Aung Taan sinah report an tuah tiah kan theih.

Hi kong ah mindat mino hruaitu Salai Mangom cu The Chinland Post nih kan peh tlaih. “Hi kong hi July 19 ah khan Sipin committee le zung riantuanmi hna nih cun an theih cang nain a leng ah chuahter loin anmah nih ceih le daihter an timh. Asinain July 22 ah hawikom sinin ka theih i U Mang Ng’Thang Hnga kha media nih an in hal tikah siseh hluttaw nih an in hal tikah fiang tein na chim ngam lai maw ka ti i ka chim ngam lai a ti caah ka facebook ah ka tial” tiah a chim.

U Mang Ng’Thang Hnga hi sipin ah nica in zung rian a lut mi asi. Zung rian a luh lio ah a nu nih sipin committee chairman sinah sing 18 zik a rak nawhpiak. Cucu amah Mang Ng’Thang Hnga nih a hngal lo. July 17 ah a nu le an i si i a nu nih tangka kan liampiak mi ka cham a ti caah Mang Ng’Thang Hnga nih a ca i zik an rak nawhpiak kha a hngalh. Cu hnu cun Mang Ng’Thang Hnga nih sipin Committee chairman cu tangka pek than dingin ca a kuat tiah kan theih.

Mang Ng’Thang Hnga nih “Hi kong hi keimah hngalh loin ka nu le pa nih ziknawh an rak pekmi a si. Zung riantuan hi ka huam lo nain ka nu le pa nih tangka kan pek cangmi a si i tuan ko tiah an ka hnek caah December 6 khan zung ah cun rian ka tuan. Asinain ka nu le pa nih an ka capo tiah ka ruah peng. Ka pa nih a kan thihtak hnu in ka nu he kan i si, sing 20 dih in rian kan luhter mi na si. Tangka ka pekmi hna zong ka lak than lai a ti caah ka thinhung va la than ka ti. Cun July 17 ah khan sipin committee zungkhan chungah tangka sing 20 ka pe than uh tiah ca ka tial i ka va chiah. Cun July 19 ah khan Sipin Committee chairman U Ta’’m Lein nau nu Tam Man thinhung ngai in a ra U Ta’’m Leing he phone i chawn uh a ka ti i kan i chawn. Mah ahcun U Ta”m Lein nih cun na nu le sin in tangka ka lak tak ko. Sing 18 a si, cun laipuan zunkhat he Sipin Minister Salai Isaac Khen ka pek tiah a ka ti. Ka Nu le nih hin sing 20 pek an rak timh ko nain sing 18 lawng hi an pek taktak mi cu a si rua. Ca ka tial hnu lawngah ka hngalh ve” tiah TCP ah a chim.

“Pu Ta’’m Lein cu ka pehtlaih tikah tangka hi ka cohlan ko. Asinain keimah nih kaa lak lo. Chin ramkulh sipin Minister hlun Salai Isaac Khen a tuan lio a si i laipuan zunkhat he tangka cu Mininster pa ka pek. Kei cu a karlak ah a cohlan piaktu lawng ka si a ti. Cun MP U Aung Taan ka chawnh i report nak hi ca in a um lo nain phone in cun an kan chimh cang i kan tlangtlak ko lai a ka ti” tiah Salai Mangom nih a chim chap.

Sipin Minister hlun Salai Isaac Khen nih, “Hi kong hi zeihmanh ka hngalhmi a si lo. Keimah he dengteo in aa pehtlaimi thil zong a si lo. Cun ka theih sin tein July 22 ah U Ta’’m Lein cu ka chawnh i tangka ka cohlan bal mi a um lo a ka ti. Keimah min a chim caah phung ning tein nawlnak ca na tial lai i na ka kuat lai ka ti. Cun ziknawh a petu chungkhar hna an fapa te nih khan report tuah sehlaw chekhlatnak tuah hna seh law a tha bik. Kei cu hi kong lawng lo kum hnih fai rian kan tuannak ah tangka kong ahcun mi zeipaoh nih chekhlat khawh ka si” tiah TCP ah a chim.
U Mang Ng’Thang Hnga cu kan pehtlaih nain inn ah a phone a philh i amah cu zung a kai ti a si caah kan pehtlai kho lo. Cun U Ta’’m Lein cu a awr a fah caah Yangon sii aa thlop i a tlun lio lam cung ah a um caah hi kongah bia ruah awk ka tha rih lo a kan ti.

U Ta”m Lein nih “Mang Ng’Thang Hnga hi 2017 November ah Malaysia in a tlung. Tangka zong zeihmanh aa phurh rua lo. Ka uu nu sinah Mang Ng’Thang Hnga a nu nih sipin ah rian a lawn ahcun rian luhter an duh venak kong a rak chimh. Rian cu minung pahnih nih an sok i pakhat cu a umnak address a tial chih lo caah Mang Ng’Thang Hnga cu committee biachahnak in rian kan pek i 2017 December 6 in rian a lut. Tukum June thla tiang kha thlakhat ah 110,000 thlahlawh kan pek. July thla in 120,000 a ei. Mang Ng’Thang Hnga nu hi chungkhat zong kan si. An sin in tangka fangkhat hmanh zong ka la bal lo. A pa a dam lo lio ah keimah nih 30,000 ka bawmh bal. A thih lio zongah a ruak fimhlawmtu kan si. Cun Minister hlun Salai Isaac Khen sinah tangka sing 18 le laipuan ka pek timi bia zong hi ka chim bal mi a si. Keimah hi July 11 in ka dam lonak ruangah Yangon ka kal. Cun Sipin Committee minung 5 chungah keimah lawng hi zumtu ka si. Cucaah ka um lo kar theng i sel in an ka tuahto hram hram mi a si tiah ka ruah. Cun Salai Isaac Khen sin zongah nawlnak ca ka tial lai timi ka chim bal lo. Mindat ka phak in hi thil hi ka kherhlai lai i ka remhcuh dih lai. Cu hnu ah a phichuak mi tlamtling tein ca kan kuat than te lai ka ti. Hi kong hi cu khuanu khuapa le a dang dang tuanvo ngei zung lutlai vialte sawm in fianternak ka tuah lai, upadi ning in ka kal lai. Pathian nih biatak cu a langhter ko lai” tiah a chim.

Hi kong cu Mang Ng’Thang Hnga nih ramkomh hluttaw sin zongah ca a tial cang i Mindat MP zong nih Chief Minister sinah ca an tial cang lengah Mindat Sipin zong nih chekfelnak an tuahmi cunglei ah an kuat cang i uknak tlaitu pawl nih chekfelnak tuah chap ve ding in an kuat hna lio a si tiah kan theih.

Hi kong hi felfai tein an chekhlat i mizapi ca zawnruahnak le ziknawh eihmuar a tlaunak ding tuanvo ngeitu nih biatak tein hma lak le tlangtlak a herh mi a si tiah Mindat Mino nih an chim.

About The Author

Na ruahning rak langhter ve.. (Leave a comment)

%d bloggers like this: