Minister Lal Thawm Thang Cu Leitang Chuak Le Pawngkam Zohkhenhnak Minister Rian An Khinh Chih

TCP-Hakha| 2019 May 6| Sagaing ramthen cozah phu ah Leitang chuak le Pawngkam Zohkhenhnak minister ah Chin miphun kongkau (Chin Affair) minister Pu Lal Thawm Thang cu rian an khinh chih tiah kan theih.

2019 kum thawkka ah Sagaing ramthen cozah phu ah ministry zung pakhat an karhchap i minister pakhat rian pek a si lai tiah thawngpang a rak chuak.

Cu hlan ah Leitang chuak le Pawngkam zohkhenhnak ministry zung rian cu Cinthlaknak-Zuatkhalhnak le Seemaing minister Pu Kam Za Mung nih a tlaih chih. Amah ministry zung tang ah rian phun 26 tiang tuanvo laak in a tuan caah rian a tei lo. Cu ruang ah rian thenphawt chap a hauh caah minister pakhat a herhnak cu a si tiah hluttaw palai hna nih meeting ah an chimphuan.

“Zung rian hna zong ka tawlrel cang i leitang chuak le pawngkam zohkhenhnak biahalnak pawl zong keimah nih tuanvo laak in ka leh cang hna” tiah Minister Pu Lal Thawm Thang nih a chim.

Pu lal Thawm Thang hi cu hlan ahcun Chin Miphun Kongkau (Chin Affair) Minister rian lawng a tuan. Asinain, atu cu mah rian lawng si lo in Leitang chuak le Pawngkam Zohkhenhnak minister rian zong a tlaih chih cang.

Minister Pu Lal Thawm Thang kuttang ah Thingram zung, a linhnak hmun hninghnoternak zung, kokek pawngkam zohkhenhnak zung, Myanmar thing riantuannak, No.5- Ahtat-ta sehzung, leitang chuak zung, Myanmar Cite riantuannak, No.1- leitang chuak riantuannak, No.2- Leitang chuak riantuannak, Lungvar cawhnak (Khanti, Myanmar Zinan chuak thilri zuarnak rian phun 11 an si.

“A hramthawk ahcun minister pakhat rian pek a si lai tiah thawng a chuak. Atu ningte hi a tha ko, mi thar rian an pek ahcun budget a hlei in a dih lai. Atu cu rian a tei khawh lai ti ka ruah” tiah Sagaing ramthen Chinthlaknak-Zuatkhalhnak –Leitang chuak le Pawngkam zohkhenhnak lei committee chungtel U Wanah nih a chim.

Cinthlak Zuatkhalhnak le Seemaing ministry zung tang ah ramthen Ta-mah-wah-ya-mah zung le ramthen cinthlaknak le thlopbulnak zung zong Sipin ministry zung ah rian thial in tuanvo a laak tiah theih a si.

Ref: MP Daw Thant Wai Kyaw facebook

Na ruahning rak langhter ve.. (Leave a comment)

%d bloggers like this: