Minister Pau Lun Min Thang Nih Chinram Tanghra Result A Chiatnak A Ruang Phun 4 In A Fianter

Minister Pau Lun Min Thang

City Hunter| 2018 June 4| 2018 kum Myanmar ramchung ah Chinram tanghra result a chiatnak bik kong he pehtlai in a ruang phun 4 le zeitindah kan thatter a herh timi kong Chin ramkulh Social Affair Minister nih The Chinland Post sin ah fianternak bia a chim.

“Myanmar ramchung tanghra ah Chin ramkulh result a chiatnak bik le zatuak 16.64% lawng kan awnnak a ruang bik a pakhatnak cu; subject kip siangcachimtu saya/mah thazaang kan i zat lo ruang le quality ngeimi siangchimtu tlamtlingte in kan ngeih lo ruang ah a si. A pahnihnak cu cathiam deuh paoh Chinram ah tanghra phi lo in Kawlrawn ah tangka tampi dih in a va phit ruang ah a si. Kawlrawn i an va phit tikah distinction tampi he awnnak an hmu ve. Pathumnak cu pehtlaihnak lam le sul a chiat ruang ah siangngakchia siseh, siangcachimtu an khuallam a har i an tlunkal tikah a caanhmante in an riantuannak khua an phan kho lo i a caanhmaante in ca an chimh khawh hna lo ruang ah a si. A palinak cu nau pawi, fahrin khunh (leave) hi thlaruk a si tikah siangcachimtu sayamah te hi fapawi le fahring an tam. Khunh pek lo awk an that lo tikah anmah airawltu ding ah saya/mah te rian khanh khawh an si ti lo i khua pakhat ah minung pahnih thum hna nih siangngakchia catang kip ca an chimh theu hna. Hi ruang ah hin siangngakchia cathiamnak ding tampi a donh” tiah Chin ramkulh Social Affair Minister Pau Lun Min Thang nih The Chinland Post ah a chim.

“Chinram tanghra result a thatnak ding ah nikum in khan siangcachimtu training tampi kan pek hna. Asinain a biapi in kan herhmi cu subject kip hoih in siangcathimtu tlamtlingte in ngeih hi a si. Cun, quality ngeimi siangcachimtu kan herh fawn. Zeiruang ah ti ahcun siangcachimtu saya/mah te hna nih siangngakchia an chimh dingmi hna ca kha an thiam taktak le fiangte in an chimh khawh hna a herh. Cu ruang ah quality ngeimi saya/mah an si hmasa hi a pakhatnak ah a biapi bikmi a si. A pahnihnak ahcun sianginn kip nih an herhmi zat in siangcachimtu saya/mah chiah le pek hi a si. Cathiamnak ding ah a hrampi cu siangniamrun a si. 2016-17 kum ah Chin ramkulh ah siangngakchiam cachimtu saya/mah 1241 rian kan khanh hna. Cu ruang ah atu siangniamrun siangngakchia pawl tanghra an phak tikahcun Chinram tanghra result hi tampi a thlen te lai i a tha ngai te ko lai” tiah a biapeh ah a chimchih.

2018 kum Myanmar ramchung ah Chin ramkulh tanghra result a chia bik, zatuak 16.64% lawng an awng. Chin ramkulh ah Paletwa hi result a chia bik, zatuak 4.25% lawng an awng. Tukum Chin ramkulh ah Distinction tambik hmutu cu 5D in minung pahnih an si tiah kan theih.

2018 kum Chin ramkulh ah tanghra result a tha bik cu Falam peng an si, zatuak 23.43% an awng. A changtu ah Mindat peng an si, zatuak 22.17% an awng. Nikum ahcun Hakha peng an tha bik. Result a chia bikmi cu nikum he tukum he Paletwa an si, zatuak 4.25% lawng an awng. A changtu cu Thantlang peng an si, zatuak 12.70% an si.

Kawlram chung ah zatuak in tanghra result a tha bikmi cu; Ramleng (foreign) cachek zung a si, zatuak 44.83% an awng. Ramkulh le ramthen in result a tha bikmi cu; Mandalay ramthen an si, zatuak 38.17% an awng. 2018 kum zatuak in Myanmar ram pumpi tanghra awng result cu nikum nakin a tum deuh, 32.82% lawng an si. Nikum ahcun 33.89% an awng.

Na ruahning rak langhter ve.. (Leave a comment)

%d bloggers like this: