Minister Rian A Lawngmi Zaka Thim Dingah Ralbawi Hlun U Soe Htet Cu Chin Ramkulh Hluttaw Chungah A Konglam An Phawtzamh
TCP-Online| 2018 May 24| Chin ramkulh cozah rian ah atu lio a lawngmi Minister zaka ah thim dingin ralbawi hlun rak tuan balmi le atu lio Amyotha hluttaw ah Director chang simi U Soe Htet cu Chin ramkulh hluttaw nih tuni tonpumhnak an tuah lio ah a konglam cu hluttaw palai sin ca in phawtzamhnak an tuah.
Hluttaw Speaker chang U Aung Taan nih “U Soe Htet hi Paletwa pengmi a si. A konglam pawl cu hluttaw palai nih thei cio hna seh tiah tuni khan palai cio sinah ca he phawtzamhnak zong kan tuah. Amah kong hi hmailei ah kan ceih than te ding a si” tiah Khonumthung thawmzamhca sin a chim.
Chin ramkulh Sipin, Electric le Industry minister Salai Isaac Khen cu rian a tei lo ruang ah amah lungtho te in dinhnak ca a tial. Cu ca a tialmi cu Myanmar rampi President U Win Myint nih phungningte in May 17 ah cohlannak le riandinhnak cathanh a chuahpiak.
Minister a thar thim than ding kong he pehtlai in Pu Zo Bawi nih cun “Sipin minister airawltu ding minister thar cu thim a si te ko lai. Sihmanhsehlaw, zeitindah thim a si lai, zeitik ah dah thim a si lai. MP chung in thim a si lai, a lenglei thiamsang (expert) dah thim an si te lai timi cu zeihmanh aa fiang rih lo. Cun, hi kong cu May 24 ah tuah dingmi Chin ramkulh hluttaw caanhmaan tonpumhnak ah ceih a si rih lai lo. Duhsah in ceih a si te lai” tiah The Chinland Post ah a rak chim.
Nain, tuni hluttaw tonpumhnak ah Minister zaka ah cozah nih thim an duhmi ralbawi hlun U Soe Htet cu a konglam zong hluttaw palai cio sin phawtzamhnak an tuah. U Soe Htet cu Chin ramkulh Sipin, Electric le Industry Minister ah thim a si ding le ding lo ding kong cu theih a si rih lo. A ralaimi hluttaw tonpumhnak ah biafiang zong a chuak than te lai ti kan theih.+++
About The Author
