Minister U Soe Htet; Ramkulh Dirhmun In Hakha Ah Chin Miphun Ni Kan Tuah Lai

Tawk Tling Thang | 2019 January 14| Aralaimi February 20 ah Chin ramkulh huap in Chinram cozah nih Hakha ah Chin Miphun Ni (Chin National Day_ CND) an tuah lai tiah kan theih.

Hi kong he pehtlai in Chin ramkulh Cozah bu chimnak nawlngeitu le Electric and Sipin Minister a simi U Soe Htet nih atu bantuk in The Chinland Post ah a chim.

“Tukum 2019 kum Chin National Day (CND) cu Hakha ah Chin ramkulh huap in February 20 ah kan tuah lai. Hakha ah tuahding in biakhiahnak kan tuahnak a ruang bik cu; cozah riantuantu lutlai khualriahnak inn a tlamtlin bik ruang le February 20 ah Chin ramkulh Hluttaw zungpi hunnak tuahchih ding a si ruang ah a si”.

“Tedim khuami nih Tedim ah tuahding an duh i an hal. Sihmanhsehlaw, Cozah bu nih kan ceih i Hakha ah tuahding in biakhiahnak kan tuah than. A ruang cu; Tedim cu cozah riantuantu lutlai riahnak hmunhma a tlamtling lo. Cun, a caan aa detkhawt tuk cang caah cozah budget tamdeuh a dih ding a si ruang zong a si chih” tiah a biapeh ah a chimchih.

President U Thein Sein cozah thar a kai hnu in CNF le cozah tawlrelnak he ramkulh dirhmun in Chinram ah Chin Miphun Ni tuah a hung si zungzal cang. Hakha ah voihnih, Mindat ah voikhat le Falam ah voikhat tiin an tuah.

Paletwa ah tuahding in biakhiah a rak si bal nain relremlonak tampi ruang ah an tuah lo. Tukum hi Paletwa ah a si cang lai tiah Paletwa pengmi nih an i ruahchan ngai tiah kan theih.

Paletwa ah CND tuah a si lonak kong he pehtlai in Minister U Soe Htet nih atu bantuk in The Chinland Post ah a chim.

Chin ramkulh dirhmun in Paletwa ah CND tuahding hi aa relrem rih lo, timhcia (ready) a si rih lo. Khualriahnak thami a um rih lo. Asinain, atu te in Paletwa ah CND tuah khawhnak ding timhlamhnak kan ngei cuahmah cang. Cucaah, 2020 kum ah Kaladan Simanking hunnak tuah pah in Paletwa ah Chin National Day cu tuah si te seh tiin lungtlinnak kan ngei”.

Tukum Hakha ah tuah dingmi CND ah Khuangcawi a um lai, Lai paih a um lai, hlasaknak a um lai. CND tuahnak caah a tlawmbik ks. sing 1000 hrawng tal dihding in budget an tuakchunh tiah kan theih.

Na ruahning rak langhter ve.. (Leave a comment)

%d bloggers like this: