Mipi Aiawh in CHRO Salai Bawi Lian Mang le US Secretary of State Tonnak An Ngei

0

US Secretary of State le a changtu le Salai Bawi Lian Mang (Online) tonbiaruahnak ngeih lio (Photo: Salai Bawi Lian Mang Fb)

Editor – 2021 July 13|United States (US) Cozah in Ramdang Pehtlaihnak Vuanci (Secretary of State, နိုင်ငံခြားရေးဝန်ကြီး) sawmnak in Ramkomh Kawlram (Union of Burma) mipi aiawh in Chin Human Rights Organization (CHRO) in Salai Bawi Lian Mang telh in a dang mitlawmte he tonnak an ngei tiah theih a si.

“State Secretary le Ramkomh Kawlram mipi aiawh in zatlang/mibu hruaitu upa tonnak an ngei” tiah US cozah chimnak nawlngeitu Ned Price nih July 8 ah a thanh. Hi tonnak ah ahodah a tel kho timi bel an langhter lo.

Hi tonnak ah, CHRO upa pehtlaihnak kan tuah hna tik ah, “Secretary of State (နိုင်ငံခြားရေးဝန်ကြီး, Ramdang lei Vuanci) Antony Blinken sawmnak in tuah mi Innka Khar (Close Door) meeting a si. Amah Secretary of State pumpak le Assistant Secretary of State Lisa Peterson he direct in tonnak a si. A bik in CHRO in cun, Chin miphun nih kan ton cuahmahmi chung in le atu lio Ramkomh Kawlram (Burma ram) i thil kan tonmi kong ah chimrelnak le biaruahnak kan nei kho” tiah The Chinland Post ah a chim.

US cozah upa he tonnak kong ahcun, a lenglei ah langhter awk a tha rih lo. Nain, a dang pakhat chim awk a tha mi cu “nizaan (July 12) ahkhan CHRO le UNHCR zong tonnak kan ngei. A bik in, Chin miphun kan dirhmun, ralzam in a um mi hna kan sining kong ah zeitindah bawmhnak rian kongkau ah kan cawlcangh khawh lai. Kan tuan ti khawh lai timi kong biapi in kan i caih tiah”, CHRO in Salai Za Uk Ling nih, the Chinland Post ah a chim.

Tutan tonnak kong he pethlai in, US cozah chimnak nawlngeitu zong nih Innka Khar tonnak a si bantuk in, zeihmanh an langhter mi a um lo. US cozah Website ah, July 8 ah “Nihin ah Secretary Blinken nih Ramkomh Kawlram aiawh in tonnak a ngeih hna. US nih Democracy, Human Rights le Rule of law a um khawhnak ding caah le Ramkomh Kawlram nih Democracy lamthluan cung ah a kir khawh thannak hnga ding caah le sualtuahtu nih an sualman an in nak ding lamthluan ah kan dirpi hna tiah an langhter.

Tonbiaruahnak ah a telmi, CHRO in Salai Bawi Lian Mang nih, “Innka khar (Closed Door) meeting a si caah zei kong dah kan chim, a hohodah midang an itel timi tucu anmah Cozah lei nih an thanhmi pin in vun chim awk a tha rih lo” tiah a pumpak Facebook ah a langhter.

US Secretary Antony Blinken nih, July 8 ah “Ramkom Kawlram mipi aiawh in zatlang phu aiawh he tonnak ka ngeih khawh caah ka lawm. Phungning tein nan thimmi Democracy cozah a dir khawh thannak ding caah nan cawlcanghnak ah US nih kan in dirpi hna… tiah a pumpak Tweeter in a thanh.

“US cozah hi Burma ram democracy le nuhrin covo caah fakngai in le hmaisuang in a dir mi a si. Atu hi kan ithok nak lawng a si rih. Pehtlai in kan i chawn lengmagn lai an ti caah ka tha a nuam. Kan chimrel khawh mi hnihkhat Pathian nih thluachuah pe ko seh” tiah Salai Bawi Lian Mang nih a pumpak Facebook ah a tial chih.

About The Author

Na ruahning rak langhter ve.. (Leave a comment)

%d bloggers like this: