Miss Htet Htet Htun Yangon Sipin Committee Thimnak Ah Aa Cuh Ve Lai
TCP-Thantlang| 2019 February 7| Yangon khua chung Sipin Committee thimnak (election) ah i zuamcuh dingin ka pa nih a ka duhpiak pin ah keimah duh tein le ram caah riantuan a si ti lungput he zuam kaa timhnak cu a si, atu hi soknak ca ka chiah lio a si tiah Miss Htet Htet Htun nih a chim.
“Rampi caah leengdawh (Miss) lei ah ka tuanvo ka tlinh cang tiah kaa ruah. Ka pa nih Sipin Committee thimnak a um lai ti a ka chimh i ka pa zong nih a ka duhpiak ve. Kapkhat lei ah ram ca riantuan a si ve ko ti lungput he Committee ah zuam kaa timhnak a si. Ka pa nih hin tling kho dingin a saduhthah cu a si i ka tlin le tlin lo cu vanthat le that lo tu a si te lai, nain ka si khawh chungin kaa zuam ve lai. Ka pa nih hin President i cuh kho ding tiang hmanh in saduhthahnak a ka ngeihpiak” tiah Htet Htet Htun nih a chim.
Htet Htet Htun a pa Dr. Tin Tun cu 2014 kum lio ah Yangon khua chaklei pengkomh sipin Committee ah Chairman zong a rak tling bal mi a si.
“Atu bantuk in kaa zuamcuhnak ding kongah ramkhel lei kongkau zong hawi bantuk in thukpi in ka hngal lo. Asinain, Leengdawh ka hmuh lio i mi bawmhchanhnak rian ka rak tuannak tete zong he aa pehtlai tiin ka hmuh. Atu sipin Committee rian zong khua thianhlimhnak, mizapi ca riantuan le thanchonak kong he aa pehtlai i cu rian he cun aa dangtuk lai lo ti kan hmuh tikah le a dangdang a herhmi tete zong theih le thiam kaa zuam rih lai i a si kho te ko lai” tiah a chim.
Atu ah soknak ca cu a chiah cang i mizapi sin mee lemsoinak caan zong thlakhat bak te aa duh rih i zeiti muisam in dah mee lemsoinak a tuah lai ti aa fiang rih lo.
Miss Htet Htet Htun cu Miss Universe Myanmar 2016 zuamnak ah Myanmar ram aiawh in a rak i zuamtu a si i Myanmar ram caah National Costume laksawng a rak hmu tiah theih a si.
Ref: Duwun
About The Author
