Miss Sabina Lal Rem Ruat Nih 2nd Runner Up Le Miss Best National Costume Award A Co
TCP-Hakha| 2019 January 30| 2019 January 25-30 tiang Yangon khualipi Kyike Kasan Stadium ah tuahmi Ethnc Culture Festival i Miss Ethnic Myanmar 2019 leengdawh zuamnak ah Chin ramkulh aiawh in aa zuammi Miss Sabina Lal Rem Ruat nih pathumnak laksawng- 2nd Runner up le Miss Best National Costume award a co.
Sabina Lal Rem Ruat nih aa hrukmi Chin thilthuam cu Chin mino Designer Ro Kim nih a serchuahmi a si.
Miss Ethnic Myanmar 2019 zuamnak ah Burma telh in tlangcung miphun zapi in aa zuammi zapi 41 an si. Hi chung ah Chin ramkulh aiawh in Miss Sabina Lal Ram Ruat (Falam), Miss Hniang Hlei Sung (Hakha) le Miss Magret (Matupi) an i zuam. Top 20 tiang ah an pathum in an i tel kho.
Sihmanhsehlaw, top 10 ahcun Miss Sabina Lal Rem Ruat le Miss Hiang Hlei Sung lawng an i tel kho cang. Asinain, Miss Magret nih Best In Talent Award laksawng a co ve.
Miss Hniang Hlei Sung cu top 10 tiang aa tel kho. Miss Sabina nih 2nd Runner up le Best National Costume laksawng a co. Miss Ethnic Myanmar 2019 winner cu Kachin nu M Ja Seng nih a co. 1st Runner up cu Kayah miphun a simi Ann Grace nih a co.
Miss Ethnics Myanmar 2019 winner laksawng cu Ks. sing 50 man crown, Ks. sing 150, tamhnak thilri ks. sing 20 man, minthang fashion designer tuahmi thil kum 1 free hruknak nawl, haa free tein kum 1 remh khawhnak, Real fitness ah $1000 man (kum 1 chung) gym celhnak card, Culture Tourism Ambassador ah thim a si pin ah laksawng tampi a hmu.
M Ja Seng nih Miss Ethnics Myanmar sinak in rian khinhmi a tlamtlinh lo sual ahcun 1st runner up simi Kayah miphun Ann Grace (kum 20) nih a chawnte lai.