Miss Tourism World Wide Ah Aa Zuammi Liomi Mai Rebecca Aung
City Hunter| 2018 July 8| Mai Rebecca Aung cu Yangon ah tuahmi Kawlram chung ramkulh le ramthen dihlak in ngaknu dawh tampi an i zuamnak ‘Miss Tourism World Wide Yangon Division’ ah aa zuam liopi a si. July 10 zanlei suimilam 4:00 tiang vote pek khawh a si tiah kan theih.
Hi zuamnak cu Golden Beauty Myanmar Organization tawlrelnak in tuahmi a si. A donghnak bik zan zuamnak cu Yangon i Excel Hotel ah July 10 zan suimilam 6:00-9:00 tiang an tuah lai. Final zan zohnakcaah 09404999100 ah ticket cawk khawh a si. Hi zuamnak in aa tlak bikmi pakhat an thimte lai. Cu an thimmi cu Myanmar ram aiawh in Indonesia ah ramdang lengdawh tampi he aa zuam than te lai.
Mai Rebecca Aung nih, “Mara (Chin) ngaknu ka si. Chin miphun dihlak nih i zohthlami si ka duh,” tiah July 2 ahkhan a facebook ah a tial. Amah hi model lei a zuammi le ram le miphun a daw ngaimi a si tiah kan theih.
Mai Rebecca Aung cu vote pek ning cu; A hmasa bik ah Golden Beauty Myanmar Organization Offical Page like tuah hmasa a herh. Cun, mah page i an taarmi Mai Rebecca Aung hmanthlak kha Like pek le share tuahpiak a herh.
Golden Beauty Myanmar Organization Offical Page hi hmet law page kha LIKE na tuah lai i Mai Rebecca Aung hmanthlak thim in like pek le share tuah khawh a si.
Like pakhat ah vote khat relpiak a si bantuk in share voikhat na tuahmi kha vote 3 ah an relpiak lai. Share tuah hi rikhiah a um lo, minung pakhat nih duhzat paoh in share tuah khawh a si. Asinain Golden Beauty Myanmar Organization Offical Page na Like hmasa lo ahcun Mai Rebecca Aung hmanthlak na Like mi le Share mi kha an rel lai lo.
Mai Rebecca Aung hmanthlak hi Like le Share a tambik ahcun “Mizapi Thimmi Laksawng (People’s Choice Award” a ngahte lai.
Mai Rebecca Aung (kum 19) hi Pu Khin Aung le Pi Shwe Ta Lin fanu, Mara (Chin) a si. Shan ramkulh ah a chuak nain atu cu Yangon ah khua an sa cang. Yangon ah Zoology major in kum 1nk University a kai lio le Bible lei ah B.Th kum 2nk a kai lio a si.
About The Author
