Mission Ah Thlahmi Sayama Pahnih Khuami Nih An Vuak Hna
TCP-Thantlang| 2018 July 11| Rakhine ramchung Ann peng, Pa-de-caw khua Mission ah thlahmi sayama pahnih cu khuami hna nih Pathian thawngtha nan chim kho lo hi khua in chuak u tiah an thawl hna pin ah an vuak hna tiah theih a si.
Sayama pahnih cu thawngtha chim dingah U Tin Phe inn ah a ummi an si i a tubantuk in khuami nih an rem hna lo caah an vuak hna hi a si. Rakhine ram chung, Ann peng hrawng ah hin Laimi nih Mission thlahmi an um deuhnak hmun a si. Khirhfa sayama pahnih cu an umnak inn cu khuami hna nih tlakrawh in an cheh, biadawhcah lo in an hrocer hna pin ah an bengh fawn hna” tiah khua mi pakhat nih a chim.
“Khuami nih an umnak inn cu an kulh dih i sayama pahnih cu rak chuak u, tiah an au len, asinain an thinphang lai tiin an um lo tiah kan chimh hna. Asinain an ngaih lo caah sayama pahnih cu an chuah hna i hman an thlak hna, an phone zong an chuh hna, an kulh hna i an bengh len hna” tiah Pastor U Tin Swe nih a chim.
“Thil sining hlat dingin Pa-de-caw khua palek an ra i Pastor pa le sayama pahnih cu khuabawi zung ah auh in hi hnu ah pehzulh in Mission rian tuan ti lo ding le thawngtha chim ti lo ding biakamnak minsen thutnak an tuahter hna caah sayama pakhat cu caan tlawmpal lungfim lo le lungnuam lo ngai in a um. July 9 ni khuami hna nih an buai hnawh hna lio ah tlangtlak dingin palek zungah phone kan chawnh ko hna nain an phone an tlaih duh lo pinah Power tiang an phih” tiah Pastor pa nihcun a chimchih.
Pa-de-caw khuami U Nay Aung nih an buaibai taktaknak kong, pawngkam thil sining he zoh in sayama te an rian ngolpiak dingin khuami nih an nawl hna nain an duh lo caah an buainak kong zong fiang tein a chim.
“Sayama pahnih cu hi khua ah ra in bu an dirh. Khrihfa ah a lutmi pakhat, hnih cu an um. Asinain khuami nih an kham hna. Hi kongah tha tein sayama pahnih cu ngol ko u kan ti hna nain an duh ve lo. Sayama pahnih nih hin Khrihfa Mucu sianginn an tuah thannak kong zongah uk nak lei zongah thawngthanhnak an kan tuah lo. Cu tikah hi khua ah chiahmi phungki saya pa le a khuami cheukhat hna nih va lenkai dingin an kal. Asinain an um lo tiah an hlen hna caah an luh hnawh hna i an rak um ko kha an hmuh hna. Khuami nih cun an vel hna lo, tiah khuabawi pa nih a chim.
“Atu bantuk in Mission riantuan dingin sayama pahnih an rat caah Buddist bia mi hna nih an rem hna lo nak kong, kap hnih remdaihnak an ngei kho lai ka zumh ko” tiah U Nay Aung nih a chim.
Ref: Friday Times News Journal
About The Author
