Mizapi Cu Dantat Kan Si Nain Cozah Upa Hna Nih Tah Phungning Tein Rian An Tuan Ve Maw?

The Chinland Post| 2019 February 28| Careltu dihlak i nan hmuhning le nan ruaknak rak kan cheu cio uh tiah ahmasabik ah kaan sawm hna. Hakha Khuahlun Innral sang ah Pu Biak Za Sang i apu nih aluancia kum 60 in nihin ni tiang dum tuah lio mi hmun ah Khuahlun Khuabawi Pu Far Kam nih Mobile Tower saknak ding vawlei hlan man thlakhat ah singhnih (200,000) in company he kum 15 ca Sachoh an tuah i Tower a sakter hna.

Dum tuahtu theihternak le lungtlinnak um lo in kan cinthlak mi vialte a kan hrawhpiak dih caah le Mobile Tower sakter hlah uh tiah 2018 June 4 in dum a tuahtu kanmah Pu Biak Za Sang te nih duhlonak ca cu penguk zung, sipin committee, pengkomh uknak lei tawlreltu committee Chairman le tuanvo ngeitu minister hna sin ah ca kan tial. Asinain, nihin ni tiang biachahpiaknak aum rih lo.

dum an tuahmi ah tower tung an sakmi

Mah hmun license kan ngeih lo mi kha Khuahlun Khuabawi Pu Far Kam nih cherhchan i lak in-

  1. Hmun lawng, Zohkhenhtu a ngei lo mi hmun asi caah sang vawlei asi ati mi kong ah Mobile Tower sak a timh lai ah hin sipin committee pahnih nih saknak ding hmun cu Pu Far Kam he an rak zoh i cinthlakmi aum le um lo an hmuh. Thlaici kheu zong kan i phawi an ti. Tower sakter a timh ning cu vawlei hlan man hi sang caah kan hman lai a ti. Kum 60 leng hmun zohtu aum komi cu Zohkhenhtu ngei lo hmun ah an chiah.

  1. Pu Biak Za Sang te nih mah hmun hi an duh lo i an chuahtak mi hmun asi tiah Khuahlun Khuabawi Pu Far Kam nih a kan ti. Hi hmun caah hin License kan ngeih ve lo caah Hmunthar ah inn hmum a satu kan lakmi zong aa um lo i chuahtak cu chim lo, aluancia kum 60 in Tower sakter hna ni tiang dum kan tuah lio mi hmun asi. Khuabawi pakhat nih thil sining thate thleih lo in biachim hi cu aa poi ngai ko.
dum an tuahmi ah tower
  1. Pengkomh tawlreltu committee haotu fial nakin Khuahlun khuabawi Pu Far Kam le ahawi le pathum nih Pu Bial Za Sang te cu chekhlatnak an tuah hna. Innhmun License nan ngeih lo caah mah hmun hi nan mah vawlei asi kho lo i vawlei hlan man zong hi nanmah Pu Biak Za Sang ten i nan co kho lo tiah vawlei tah nak zung i riantuan tu Pu Sang Thuan nih a kan ti.

  1. Hmun License caah tette piah ding kan ngei lo nain kan tette cu kum 60 in Tower an sak tiang kan tuan kan i hmaithlakmi tisik anhnah an um. Chekhlat tuahnak ah kanmah lei in Dum kan tuah an theihpi tu upa an um maw ti hal zong aa um lo.

 Cozah upa hna, cozah riantuan tu le Khuabawi hi tah an riantuan nak ah Upadi ning asi ve hnga maw?

  1. Mobile Tower sak duh lonak ca kan tialmi cung ah kanmah dum le vawlei kong i Pu Far Kam he kan buai mi kong ah pengkomh zung committee Chairman nih Pu Far Kam cuchathlatnak tuahding in a fial.
dum an tuahmi ah tower tung an sakmi
  1. Khuabawi thimnak upadi i aum mi cu aumnak sang chung ah kum 10 pehtlai tein aa um mi asi lai ti asi nain Pu Far Kam hi Singapore ah kum zeimaw zat aum hmu kum 2016 lawng in laitlang ah khua asa mi asi.

  1. Tower Sak duh lo nak kong ah tuanvo ngeitu minister Pu Sui Thio kan ton i a kan timi cu keimah i manhning law company le Far Kam he kan auh hna lai i Vawlei hi nan ta asining upadi kan rel lai. Caan ka ngeih lo caah asi ko ati. A tithan mi cu Upadi bawizik Sunny Thang Cung le Pu Far Kam hi zeitindah an i pehtlaih? Cun Pu Khin Mawng Win le Pu Far Kam hi tah an i chungkhat maw? tiah a kan hal.  Minister Pu Sui Thio sin ca kan tialmi cung ah 28.1.2019 ni ah Minister Pu Sui Thio nih Khuahlun Khuabawi le keimah Pu Biak Za Sang cu azung ah akan auh i kan duh ning a kan hal. Kei nih cun Tower hi um kan duh lo, kan hrawhpiak uh ka ti hna. Mah Mobile Tower hi zei Mobile Tower dah asi i mizei company nih dah asak ti hmanh Minister Pu Sui Thio le pehtlaihnak zung i rian a tuanmi nih an theih lomi le cozah nih saknak nawl peknak um lo bu ah Tower cu hrawh khawh asi lo tiah Minister Pu Sui Thio nih a ti. Hihi a si awk a si maw?

  1. Mobile Tower Saknak ding ah Siipin nih nawlpek nak um lo. Ngunkhuai liamding zong fangkhat hmanh liam lo in Tower cu an sak dih cang nain tutiang Siipin zung lei in dantatnak zeihmanh aum lo. Mizapi cu kanmah vawlei ah inn kan sak tikah cozah nawl lo in sak sual ah cun thehter, tazacuai le dantatnak phaisa liamter a tong mi kan um len. Asinain, mah Mobile Tower hi mizei nih dah asak timi hmanh thei lo le hmun azohtu le innpawng i aum mi nih kan duh lo ti ko bu zong ah theh a ngah lo an ti.

Zeitikah dah mizapi ca riantuantu aa timi cozah riantuantu nih mizapi misifak kan caah dingfel tein biakhiahnak a tuah hnga timi saduhthah nak he…..

Ca hi atawi nak deuh in ka tial caah a tlamtling lai lo. A fiang deuh in theih a duhmi nan um asi ah cun chawnh khawh ka si. Carel tu nan dihlak cung ah kaa lawm.

Catialtu: Pu Biak Za Sang

Biakilh: Hi cabia cu catialtu pumpak hmuhning le ruahnak a si.

Leave a Commnet

%d bloggers like this: