Mizaw 100 A Thahnak Hna Kong German Mizaw Zohkhenhtu Nih A Cohlan
The Chinland Post| 2018 October 31| Germany ram ah mizaw zohkhenhtu pa pakhat cu mithah lainawnnak ahmuh (case) in sual an puh i biaceih zung ah chekhlatnak tuah hram an thawk.
Niels Hoegel timi cu biaceih zung chekhlat hram an thawk ah ka thahmi hna minung 100 an si cang ti a cohlan caah vawleicung ah mi tambik a thattu mimolh lainawng hna chung lakah pakhat a si ve tiah cazin ah an khumh.
Kum 41 a simi Niels Hoegel cu mizaw zohkhenhtu (nurse) pakhat dirhmun in rian a tuannak Germany ram sii-inn pahnihnak ah atu bantuk in mithah lainawnnak a tuah hi a si. Sii-inn ah a rak phanmi mizaw pawl cu sii kha luan tuk in chunh in a thah hna tiah dothlattu palek pawl nih an chim.
Hiti sualnak a tuahnak a ruang bik cu mizaw pawl kha thi deng in sii a chunh hna hnu ah an nun chanh thannak phun in a riantuanti hawi nih ka thangthat hna seh ti hmuhsaknak caah a tuahmi a si. Nun chanh kho than ti lo in minung 100 an thih thainak hi a si tiah cozah lei biaceihtu (judge) hna nih an chim.
Atu ahhin Niels Hoegel cu minung 6 thihnak ah tuanvo a ngei ti in thih hlan lo thongthlak a tong cangmi a si. Atu sii-inn mizaw thihnak kong ahhin Oldenburg ah mizaw 36, Delmenhorst ah mizaw 64 ka thah hna tiah a cohlan cang. Hiti a thahnak hna hi 1999 in 2005 kar ah a si.
A thahmi hna mizaw hna i an ruak 130 cu a luancia kum ahkhan an cawh i caan sau nawn chekhlatnak an tuah hnu ah atu bantuk ahmuh (case) hi fiangte in an hmuhchuah khawh hi a si. Kum saupi mithat lainawngtu pakhat nih sii-inn ah mizaw pawl a thahmi hna ruang ah Germany ngandamnak nawlngeitu hna zong fakpi in soisel an tong.
An ruak chekmi lakah aa tel lomi mei khanghmi zong an um khawh ruang ah Niels Hoegel kut in a thihmi hi 100nak tlawmlo an si lai tiah cheukhat nih an ruahdamh.
Niels Hoegel cu 2005 kum ceo in tlaihhram an thawk i Delmenhorst sii-inn ah mizaw kha siibawi nih fial lomi ning in sii a chunhmi in an hngalh. 2008 ah mithah lainawn timhnak case in thong kum 7 an thlak.
2014 le 2015 zong ah mithah lainawnnak case pahnih, thah timhnak case pahnih he sualnak a ngei ti an hmuhchuah caah thih hlan lo thong thlak ding in bia an khiahpiak.
Cu lio ahcun Niels Hoegel nih sualnak a tuahmi ruang ah a ngaihchiatnak kong a chim i a taangmi a chungkhar hna zong lungdaite in an um ding aa ruahchannak kong a chim.
Cu pin ah a thahmi hna tamdeuh cu ahlankan timhlamhnak si lo in ruahlopi in ka tuahmi hna an si tiah a chimchih.
Thluak lei thlopbultu siibawi zong ka thahmi hna hi minung 30 an si cang tiah a chim. Hoegel thahmi cu hinak in an tamdeuh kho timi thinphannak a hung ruang ah miruak 130 hlainak le cheknak an tuah thannak hi a si.
A biapi in an chekmi cu an lung a cawlmi a dir khotu siivai ngei (chemical) sii pawl an ruak ah a um le um lo an kawl. Hoegel rian a tuannak sii-inn ah mizaw pawl an lung a dir i a nunh thannak hna kong, mizaw pawl a thimi hi Hoegel tuanvo pek a si lio ah lethnih in an tamdeuh kong sii-inn record pawl a langhter tiah Germany media hna nih an thanh.
Ref: BBC Burmese
