Mizoram ah sianginn a kaimi Myanmar hngakchia an karh

The Chinland Post | 2022 June 25 – India, Mizoram ah cacawn khawhnak ding in Myanmar hngakchia tampi ramri lonh in India ram chungah nifatin in luh a si. Mizoram cozah bawmhnak, Chin ralzaam bawmtu phu hna nih Myanmar rammi hngakchia 2,000 leng an bawmh hna i hngakchia dang zong an raa chap tiah Chin mipi phu nih an chim.

Chin le Sagaing lei kahdohnak ruangah sianginn kai kho loin Myanmar hngakchia pawl India ramri  Mizoram chungah nifain in an lut tiah Chin mipi phu nih VOA ah an chim. Kum 4 in kum 15 kar Myanmar hngakchia 2,000 leng Mizoram ah ca an cawng.

Mizoram cozah nih Myanmar rammi hngakchia pawl kha India hngakchia pawl he sianginn kaiṭi khawhnak nawl a pek hna tiah Projects to Support Refugees from Burma (PSRB) nih rianngeitu nih VOA ah a chim.

“Mizoram cozah nawl in sianginn a kai khomi hngakchia pawl cu kanmah lei hngakchia pawl he aa khat tein kaiter an si. Uniform, Text book zong cozah nih a bawmh hna. Nain a zaa ti cu a um lo”.

Hindi holh in cawnnak sianginn pawl a kaimi Myanmar hngakchia pawl caah a harbik cu holh a si. Cucaah khrihfa biakinn cheukhat kha sianginn ser in Myanmar hngakchia pawl adang tein cawnternak zong a um. Myanmar ram cacawning in chimh a si. Hngakchia 100 leng an si.

Cubantuk in Myanmar ram cacawn ning in chimhnak sianginn ahcun ramchung in a rak zaammi siangcachim pawl hruainak in chimh a si tiah Mizoram, Lunglei khua Myanmar Refugee Relief Committee hruaitu Salai Charlie Kap nih VOA ah a chim. Nifatin, Myanmar lei in hngakchia 100 hrawng India-Myanmar ramri lonh in sianginn kai ding ah an rak phan tiah a chim.

“Cheukhat khua ahcun Myanmar ram cacawn ning in chimhnak sianginn a um caah kai an duh colh. Cheukhat hmunhma ah Myanmar sianginn on a si caah kal an duh. Ralzaam pawl hmun khat te ah fonh in sianginn sakpiak kan duh ko hna nain kan hmunhma nih a phazo lo. Cucaah khuate ah an um a si. Khuate ah an kai, cheukhat cu kai lo zong in an um. A ruang cu holh an i harh tuk caah a si”.

Mizoram ah sianginn a kaimi Myanmar hngakchia 2,000 hrawng an um lai tiah a chim. Ti a har tuknak Mizoram ah Myanmar ralzaam pawl i ṭhencheu dih a si caah sianginn pakhat ah hmunkhat tein cachimh khawh an si rih lo tiah Chin mipi phu nih VOA ah an chim.

India ah aa dormi Myanmar ralzaam hna eidin caah Mizoram um Chin miphun phu pawl, ralzaam bawmtu phu pawl nih bawmh an si. SAC nih hramhram in uknak a lak hnu ah India ram a phanmi Myanmar ralzaam 40,000 hrawng an um tiah ruahdamh a si. Myanmar ram kahdohnak cungah hngat in ralzaam cazin aa thleng lengmang tiah theih a si.

Na ruahning rak langhter ve.. (Leave a comment)

%d bloggers like this: