Mizoram cozah nih Myanmar ralzaam caah Rupees sing 380 an hman cang
The Chinland Post | 2022 September 13 – Mizoram ah a rak i dormi Myanmar ralzaam hna zohkhenhnak caah hmanmi tangka hi Rupees sing 380 an phan cang tiah Mizoram ranchung lei Minister Pu Lalchamliana nih a chim.
September 6-8 tiang tuahmi Mizoram Hluttaw meeting ah Myanmar ralzaam hna dirhmun he pehtlai in biahalnak cungah ramchung lei Minister nih atu bantuk in a leh hna.
2021 February 1 ah ralkap nih hramhram in uknak a lak hnu thok in ramchung dirhmun ruangah Mizoram ah a zaammi Myanmar ralzaam cazin hi 2022 August 20 tiang cozah cazin ah minung 29,253 an um cang i Mizoram cozah nih sing 380 an hman cang tiah a chim.
Myanmar ralzaam hna hi Mizoram pengkomh kip ah sakmi ralzaam camp ah an um hna i cheukhat cu rualchan cingla sinah an um i cheukhat cu inn hlang in a ummi zong an um tiah theih a si.
Mizoram cozah High Level Committee on Myanmar Refugees biakhiahnak in Mizoram chungah aa dormi ralzaam hna cazin ṭha tein lak khawhnak hnga Refugees ID card chuahpiak an si i atu ahcun ralzaam zapi deng chuahpiak an si cang tiah Minister nih a chim.
Ralzaam chung in an umnak hmun a kir ṭhanmi an um bantuk in a rak lut tharmi zong an um caah pehzulh in cazin kan lak rih ko tiah a chim.
CHRO le mipi phu cheukhat cazin ning ahcun Mizoram chungah a phanmi Myanmar ralzaam 40,000 hrawng an um tiah ruahdamh a si.
About The Author
