Mizoram cozah nih Ralzam caah ID card an chuahpiak; A dormi 30,000 lengkai an phan
2022 February 25 — Ramkomh Kawlram ah hramhram in uknak lak a si hnu ah India, Mizoram ah a zaammi hna caah umṭhutnak a him khawhnak caah Mizoram cozah nih theihpinak (ID) card a chuahpiak hna tiah theih a si.
Mizoram, Champhai ah Ramkomh Kawlram in ralzaam 4,000 leng nih ID card an ngah cang tiah Mizoram ralzaam tawlreltu phu in rian ngeitu pakhat nih a chim.
Chin ramlkulh he aa tlaimi Mizoram ah hramhram uknak lak a si hnu in a zaammi pawl caah theihpinak Refugee ID Card pawl chuahpiak an si. A hlei in, Champhai pengkulh (district) i ralzaam 4,000 leng nih Refugee ID card an hmuh cang tiah Mizoram NGO United for Democratic Myanmar Asst. Secretary Richard nih VOA ah a chim.
“Mizoram chung ummi zapi te caah tuah a si. Asinain, Champhai hi rang deuh in tuah a si. Champhai ahhin ralzaam 10,000 leng hrawng an um. Ralzaam 10,000 leng chung ah 6,000 hrawng hi ṭha tein cazin khumh khawhmi an si. Ralzaam 6,000 chung ah 4,000 leng nih card pek an si cang i a taangmi zong hi serpiak an si rih ko lai”.
Ramkomh Kawlram in a rak zaammi ralzaam kong tawlrel ding caah Mizoram cozah nih rian a khinhmi Commissioner le Khuachung tawlrelnak rian ngeitu, Natural Disaster Management le Rehabilitation Department in rian ngeitu pawl nih Aizawl khua ah a phanmi ralzaam pawl an umnak hmun pawl cu January 19 ah an va zoh i Refugee Card an pek hna tiah theih a si.
Refugee ID card hi Mizoram cozah nih rian a pekmi hna phu nih an tawlrel tiah Richard nih cun a chim.
Hi ID card hi Mizoram cozah nih a tawlrel piakmi hna a si. ID sermi phu pawl cu cozah nih nawl a pek hna caah atu bantuk in anmah phu pawl nih an cawlcangh hi a si. Mizoram khualipi Aizawl i sang 30 leng ah ralzaam ID card hi pek an si cang.
Refugee ID card a ngahmi pawl hi Mizoram ah phungning tein caan karlak um khawhnak nawl an ngei ti duhnak a si.
Mizoram cozah nih a tinhmi cu ka ram chungah ralzaam zeizahdah an um timi cazin ṭha tein ngeih duhnak, ralzaam pawl Mizoram an um chungah him tein an um khawhnak, Mizoram chung khualtlawn an duh tikah zalong tein an tlawn khawhnak le harnak pakhat khat an ton tikah mah ID card nih bomhnak a pek khawhnak hnga hi an si.
Mizoram khualipi, Aizawl i sang 30 lengah refugee ID card serkhawhnak caah sang ukbawi nih form pawl pawtzamh in ṭuan a si. Mizoram, Champhai hi ralzaam an tambik nak a si. A dang Lawngtlai le Lunglei peng hna zongah ralzaam an um len. Ramkomh Kawlram in a rak zaammi ralzaam hi Mizoram chungah 30,000 hrawng an si i Khuachung bawmhnak phu tete nih an tawlrel hna tiah theih a si.
Ramkomh Kawlram ah hramhram uknak lak a si hnu le Chin ramkulh ah kahdohnak a fahtuk ruangah Matupi, Thantlang le Sagaing ramṭhen Kalay peng i mipi pawl India ram ah an zaam hi a si. Mizoram chung a phanmi ralzaam hi 30,000 hrawng an si. A rak phan chommi ralzaam pawl hi Mizoram cozah nih a ṭhatnak bikin a tawlrel piak ko tiah khuachung mi bawmtu phu nih a chim.#