Mizoram JCB Mawngtu Pahnih Kawl Ralkap Nih Tangka An Hal Tiah An Chim
Salai Cung Cung | 2019 January 15| Chin ramkulh Falam peng chung motor lam cawh ding in a rami Mizoram ramkulh in JCB a mawngtu minung pahnih cu January 11 ah Kawl ralkap pahnih nih tangka Sing 70 an hal hna i meithal in an tlerh hna tiah kan theih.
Mizoram ramkulh Camphai- Vaphai khuami JCB mawngtu pahnih cu Falam peng chung Motor lam cawh ding ah January 11 in Myanmar-India ramri lei ah JCB in an ra. Kawl ralkap nih an tlaih hna i tangka Sing 5 an hal hnu ah an thlah than hna tiah Vaphai khua in khuami pakhat Zautea nih a chim.
Cuti an tlaih dih hna hnu ah JCB mawngtu pahnih cu Falam peng lei ah an kal i Tibual khua pawng ah Kawl ralkap pahnih nih an tlaih than hna i tangka Sing 70 an hal than hna tiah kan theih. Ralkap pahnih nih an buaihnawh hna ruang ah Vaphai lei ah an kir than lio ah ralkap pahnih nih Vaphai khua tiang an rak zulh hna i tlaih ding in an i zuam tiah Zautea nih a chim.
“Ralkap pahnih nih Vaphai khua tiang an rak zulh hna i an JCB Motor tawh le a herh mi ca (document) pawl an laakpiak dih hna. Khua lei ah bawmh an rak hal i cu ralkap pahnih cu khuami nih kan va kulh hna i khuabawipa nih Assam Riffle ralkap pawl a chawnh hna hnu ah JCB tawh le an ca pawl cu an pek than hna” tiah Zautea nih a chim.
Cu hnu ah Assam Riffle ralkap nih Myanmar ralkap pahnih cu an sakhan ah an kalpi hna hnu ah zaan ah an thlah than hna tiah kan theih.
Chin ramkulh ah JCB mawngtu an tlawmtuk caah Mizoram ramkulh lei in JCB mawngtu pawl rian an rak tuan tawn. Tu bantuk thilcangmi ruang ah hin Vaphai khuami pawl Kawlram lei in luh chuahnak tuah lo ding in khuabawi pawl nih ralrinnak an pek hna tiah kan theih.
Ref: Khonumthung
About The Author
