Mizoram Um Chin Ralzam Chungtlik Le Raifanh Zawtnak An Tuar
Lawngtlai-Phan-Chin-Ralzaam
Vahui |2018 July 26| Kawl ralkap le Rakhine ralkap kar kahdohnak ruang ah Chin ramkulh Paletwa in Mizoram ram- Lawngtlai peng Hmawgbuchuah khua ah a zaammi Chin ralzaam hna cu atu hi raifianh zawtnak, chungtlik le pawfah zawtnak an tuar tiah kan theih.
Tu bantuk in ralzaam hna lak i raifanh zawtnak a tam hi fikfa ruang ah a si tiah kan theih i an umnak hmunhma hi thingkung ramkung a tamnak le tiva kam a si. Furcaan ah cun fikfa an tam i khiangthawng zong an ngeih lo caah raifanh zawtnak a tamnak hi a si tiah Lawngtlai khua um ralzaam bawmhnak petu Chin pa Jonah nih a chim.
“Raifanh hi cu fikfa seh ruangah a chuakmi a si, ahlan zongah anmah hi Rakhine miphun kong a cawlcangtu phu hna nih khiangthawng an pek hna, anmah nih nga tlaihnak ah an hman. Ralzaam hna cu ei din an harsa tuk i tlangcung ah a luangmi ti hi din awk i an hman caah chungtlik, pawfah zawnak an ton khunnak hi a si. Ei din raungah hin asi kho men, a kik le a lum ruang zong ah a si kho men, dinmi ti zong hi a thianghlinm lo, tlangcung ah a luangmi ti an din caah asi” tiah Jonah nih a chim.
Mizoram um ralzaam cu aralaimi October thla chungah an dih lak in an tlung lai tiah ralzaam hna i an bawi a si mi U Mang U nih a chim. Hi kong he pehtlai in tu lio ah cun kir dingah si kho rih lo, mah le khua cio ah um nak dingah har nak an um pah rih tiah Jonah nih Khonumthung ah atu bantuk in a chim.
“Kan kir theng rih lai lo, naite ah Mitwah tiang ka kal i an thutdirning a har tuk rih. Va thutdir awk ding hna a ngam kho rih lo. A va thial i a rak zaam thanmi innchungkhar 13 hrawng an um. An milu in in minung 30-40 kar hrawng an si. Cheukhat cu an kal i caau sau ngam lo in an rak kir than” tiah a chim.
Tu lio cu a zaam tharmi an um lo nain a luancia May le June hrawng ahkhan an um. Tu i Mizoram ramkulh Lawngtlai peng Hmawngbuchuah ummi ralzaam hna dihlak cazin cu 362 an si i a tamdeuh hi Paletwa peng chung ummi Rakhine miphun an si tiah kan theih.
Ref: Khonumthung News
About The Author
