MNF le Rakhine Pehtlaihnak? Pu Lalduhawm Hmuitinh le Look East Policy
Salai Tenglam| 2024 September 11 — Kum 1966 thawk in Mizo miphun pawl cu Pu Laldeng hruainak in Mizo National Front ti mi nih India ram in Independence kan duh ti in zalonnak an sual. India ram buaiter a duh peng mi Pakistan le China nih hngephngap tiah MNF pawl cu Trainning le hriamnam in an bawmh colh ve hna i, MNF pawl nih hin India cozah hi luri in an tuah khawh ve. MNF Movement an thawkka ah Mizoram chung khuapi tam ngai an rak lak manh nain Aizawl khuapi bel cu India Cozah Fighter Vanlawng nih cunglei in a bawmh hna caah an la kho thai lo. Cuticun Mizoram cu rambuai chung ah kum 20 chung a lut.
Hi Mizoram ram a buai chung ahhin Mizo National Army pawl hi Pakistan bawmhnak in East Pakistan (Atu Bangladesh ram) ah hin an rak i dor, hi East Pakistan an rak um lio ah hin zalong ngai in an rak cawlcang i Mizo National Front zong hmun hnih ah an rak kek i Pu Laldeng hruaitu ding ah a duh mi phu hna le Pu Malsawma Kawlni hruaitu ah a duh mi pawl an si i, Pu Laldeng hruai mi pawl nih amah a duh lo mi hruaitu pawl cu a tlaihter dih hna i “A dum pawl” tiah min an pek hna i Dhaka/Rangamati Thawnginn ah an chiah dih hna. Asinain 1971 thawki n East Pakistan tiah kawh mi Bangla miphun nih cun Pakisatan ram in Independence an sual caah le India bawmhnak in Bangladesh nih teinak a hmuh caah MNF pawl cu Burma ram chung Arakan ramkulh Burma Communist Party (BCP) sin ah an vai i fonh. Hi lio ah hin Arakan Liberation Army (ALA) cu an rak um ve ko nain hmual ngei in an rak cawlcang kho ding an um lo. MNF le BCP pawl hi hmunkhat ah tangti in Burma Ralkap an rak doh ti tawn i hi BCP pawl bawmhnak hin Pu Laldeng zong kha Pakistan ram ah Bawm min i hlan in a rak kal kho. BCP pawl hi hi lio ah hin an rak thawng ngai ngai i Arakan ram hi an mah nih an rak uk ti ninglaw kan palh hnga lo, anmah a dang khotu cu Burma Army lawnglawng an rak si.
Arakan miphun aiawh Arakan hriamtlai phu le MNF pawl hi pehtlaihnak zeihmanh an rak ngeih lo lawng si lo in pehtlaih ding in an rak um lo, Arakan Liberation Army cu 1968 ah dirh thawk a si i, kum 1969 ah an hruaitu le an tlaih hna caah ALP/ALA cu chikhat an i din chung. Cu hnu ah an hruaitu pawl cu kum 1971 ah thawnginn in an chuah hnu ah 1974 ah an hun thawk than nain 1977 ah India ralkap le Burma ralkap tangti phu nih India Burma ramri ah an kah hna caah ALP/ALA cu caankhat chung a hung tlau than hoi. Hi caan tawi tete an um chung te hmanh ahhin MNF le BCP tangṭi phu nih hin an kah pah tawn hna. cu lawng si lo in Arakan um Muslim hriamtlai phu Muhajideen le BCP pawl hi an i kah tawn caah MNF nih hin BCP hi an bawmh hna i BCP le MNF tangti phu nih hin ALA le Muhajideen hi an rak kah tawn hna. Cuticun kum saupi Arakan ram ah hin Burma Communist Party le Mizo National Front pawl hi an rak tuanti i Burma Ralkap zong an rak kahṭi i Ration siseh Hriamnam siseh an rak i bawmchan pah lengmang. Cu a si caah Arakan hriamtlai le Mizo National Front pawl hi pehtlaihnak an rak ngei lo kan ti khawh a si nain Arakan ram ah kum sau tuk an rak um caah MNF ralkap pawl he hin miphun aiawh si lo in pumpak in cun pehtlaihnak an rak ngei ko lai ti cu zumh a um ko. Ahlei in Arakan ram chung ah a um mi Chinlung chuak a si mi Khumi le M’RO le Bawm miphun hna he an rak i pehtlai khun.
Pu Lalduhawm hi Mizo National Front ti mi an rak thawk ka ah hin Mizo National Army/ Mizo National Volunteer ah Mizoram rambuai thawk in a rak i tel ve i, Ralkap lei ah Arsi 3 tiang a rak phan manh, cuticun ram a hung buai ka deuh te ah khan voi zeimawzat India ralkap he i kahnak zong ah ai tel ve ko nain, Mizoram ah India ralkap nih khua kip fonh in khua pakhat ah an fonh hna lio, Khua 10 kha khua pakhat ah an fonh hna lio ah khan an chungkhar zong hmunkip ah an pem hna, a u le umnak Hnahlan khua ah chikhat ai dinh lio ah Footall an khelhnak ah a ke ai hrawh sual timi chuankan in MNF in cun ai din i ramtang ah a hawi le sin ah a lut duh ti lo, cu hnu cun sianginn hna a kai than i Champhai khua ah Tang 10 a passed Mizoram Nih Union Territory dirhmun a hun phak i Mizoram Chief Minister hmasa bik Ch. Chhunga nih khan a Personal Assistant ding ah a auh i Chief Minister P.A rian cu a tuan. Cu pah cun Zan College ah BA cawng pah. MNA/MNV hlun a si mi India Ralkap he zong a rak i kap ve lengmang tawn ko mi minung cu tluk zalong in a um khawh mi le CM Personal Assistant tiang a tuan khawh mi hi khuaruahhar a si. A chung ah zei biathli dah a um ti mi cu zeihmanh hngalh a si lo. Personal Assistant a tuan lio ah hin Mizo Army pawl le India ralkap cu an i phomh cuahmah ko rih fawn. Cuticun Zan College ah BA a cawn mi cu a hung passed hnu in India Police Service (UPSC) Exam a va tuah ve i a voikhatnak ah a tling colh i IPS cu tuan in India ram Prime Minister Indira Gandhi vengtu dirhmun tiang a phan. a rak i tel ve tawnnak Mizo National Army nih an kah cuahmah lio mi hna India Cozah Police rian a va tuan than mi zong hi khuaruahhar tuk hmeteh a si ko. Cuticun India cozah le MNF pawl nih remnak an ngeih khashnak ding ah tiin IPS rian cu kaltak in Mizoram ah a tlung i remnak palai ka tuan a ti. Indira Gandhi nih a ka fial mi a si a ti than rih.
Pu Lalduhawm nih USA ah a chim mi bia he pehtlai in bia kan chim hlan ah India Policy ngan bik pakhat a si mi Look East Policy kong hi hun chim ta rih usih. A hlan ah cun India cozah nih hin nichuah lei ram he chawlehthalnak in pehtlainak tuah hi biapi tuk ah a chia bal lo, Asinain China nih Khawchak lei ram pawl he chawlehthalnak in pehtlaihnak fek a hun ngeih chin thluahmah tik ah India cu a lung a hung pem i cu thawk cun Kum 1990 Narashima Rao nih India Prime Minister a tlaih lio ah hi ruahnak hi a hung chuak mi a si, a sinain zeimaw thil tete ruang ah hmual ngei in an kalpi manh lo, NARENDRA MODI nih India Ram Prime Minister a hun tuan thawk in kum 2014 ah biatak tein hma a hun lak i Policy ah tlam a tling deuh lo mi hna a hun remh i hmual ngei deuh in an hun kalpi khawh, Hi Policy chung ah a herh ngai mi tanglam in i pehtlaihnak ding ah India cozah nih Kaladan Multi Model Transit Transport Project (KMMTTP) timi ti le lei lam cu a cawh i lam hi Kolkata in – Akyab/Sitwe (Arakan, Myanmar), cucun lei lam in a kal thluahmah i Arakan ram a tan hnu ah Chin State PALETWA peng a tan than hnu ah Lairam (LADC ramchung) ah lut in Zocachuah ti mi Lairam khuate India ram ah a va lut, Lai Autonomous District Council (LADC) hi Mizoram State chung ah Laimi nih mah tein khuakhan lairelnak an ngeih mi ram a si. Lairam chung ah hin India cozah nih hin Look East Policy he pehpar in Lei lam pawimawh ngai pahnih KMMTTP Road le Saisihchuah Road timi a ngei, hi hna pahnih a tlamtlin khawh tikah cun Silchar khi Mizoram Kutka si ti lo in Lairam chung ah a um mi Saisihchuah le Zocachuah hi Mizoram lawng si loin India ram kutka a si cang lai.
Pu Lalduhawm nih USA a um lio ah a chim mi bia pawl hna cu nolh than hau ti lo in mikip nih kan theih cio mi a si ko, India Media cheukhat zong nih Pu Lalduhawm biachim mi cu an mawhchiat i Chief Minister hmasa Pu Zoramthang cu Arakan Army an tawlrelnak kong ah hin an thangthat. Pu Lalduhawm nih USA ah a chim mi bia hi ramthen pakhat a si mi biachim ding ahcun ai dawhcah lo ngaingai mi le a zaam cia in biachim mi bia a si, Burma ramchia ah a um mi hriamtlai pakhat sawsawh nih India ram ah hin ralhmai sat in hung lut hna sehlaw India cozah nihhin a zoh sawh nemmam lai lo, India ram in a dawi hna lawng hmanh si loin an bu hmanh a choih dih lai, “Lawngtlai tiang hong hna sehlaw” timi bia lebang hi cu chim lo ding bia a chim mi a si. Kan Lairam (LADC) ramchung hi Mizoram cozah le India ralkap hmanh nih hong kan kilven piak hlah sehlaw kan mah Laimi nih kan kilven lai, Kan Lairam Hruaitu LADC Cozah, Central YLA, Lai Students, Association(LSA), Lai Women Association (LWA) le Lai Upa Bu (LUB) nawl loin Arakan Army ralkap pakhat cu chim lo hngerhte hmanh an lut lai lo.
Arakan Army ruang ah KMMTP Road hi caan saupi tlamtling kho lo in a um hi biadik a si, asinain hihi Pu Lalduhawm nih a hngalh ko nain ai hngalhter lo um in a um mi cu, Lai miphun nawl loin KMMTP lam hi a tlamtling kho ve loh ti mi hi a si. Arakan Army nih zeitluk in an ramchung ah lam cawh hi an sian ko zong ah kan Lairam chung ah Lai miphun nih siang lo in hi lam hi kan phih ve ahcun zeihmanh santlaihnak a ngei ve lo.
Hi bantuk in CM Pu Lalduhawma nih Arakan Army he tuanti ding a timi hi cu Laimi lawng si lo in Chinlung chuak miphun vialte nih kan cohlan khawh lo ding mi a si, aruang cu Arakan Army pawl nih hin Chinlung chuak ram a si mi Paletwa cu an mah ram ah chiah leh khumh an duh, kan policy ai dan lawng si loin kan duh mi ai khah caah tuanti kho kan si lo. Paletwa kan duh veve. Cucaah Mizoram Prophet tampi nih Pu Lalduhawm nih cozahnak a tlaih lio ah Mizoram ah buainak le thisen luannak a um lai an timi hi a taktak in a tlung sual lai timi hi phan a um ngai ngai.
About The Author
