Moebye kahdohnak ah SAC ralkap a thimi an tam

0

The Chinland Post | 2022 September 12 – Shan le Kayah ramri Moebye hmunhma ah kahdohnak a fak i SAC ralkap 20 hrawng an thi, KNDF fufonh lei in hriamtlai 2 nih ram le miphun caah an nunnak an pek tiah theih a si.

September 11 zinglei sml 7:00am thok in Moebye khua, Puaikung 3 sang biakinn pawngah nili chung hmunhma a khuarmi SAC ralkap pawl cu KNDF battalion 3, 11, KA, Moebye PDF, Pekon PDF, KRU, URF phufonh hna nih nikhat chung an kah hna tiah KNDF nih a thanh.

Cu kahdohnak chungah KNDF phufonh nih SAC ralkap pawl cu karceh in an kah hna caah SAC ralkap 20 hrawng an thi, hliam a tuarmi zong an tam i phufonh lei in 2 an nunnak a liam tiah a langhter.

Kahdohnak chungah a thimi SAC ralkap hriam vialte lak dih khawh a har caah MA-1 zuun 1, MA-3 zuun 2, RPG kuan pawl, 60 MM kuan pawl, pehtlaihnak seh 1, kuan le thilri cheukhat lawng kan lak khawh tiah cathanh ah a langhter.

Kahdohnak ah a sung tukmi SAC ralkap pawl nih mipi umnak sang chungah hriamngan a kah i September 11 zaanlei ah kahdohnak vanlawng in voi 2 a rak kah caah mipi inn cheukhat a rawk tiah KNDF nih a chim.

Moebye ah September 8 thok in September 11 tiang ni 4 chung kahdohnak aa peh i khua pawng umkal rih lo ding le Moebye lam pawl hman rih lo ding in KNDF le Moebye hmunhma PDF nih mipi pawl theihternak a tuah.

About The Author

Na ruahning rak langhter ve.. (Leave a comment)

%d bloggers like this: