Momauk, Shanhton Tlang In Riahcaw Lak Ah A Ṭum Mi SAC Ralkap An Kah Hna, Captain 1 Telh In 5 An Tlaih Hna
The Chinland Post | 2023 October 2 — Kachin ram, Momauk peng, Shanhton tlang ah hmunhma a khuar mi SAC IB 438, IB 437 in ralkap pawl cu riahcaw lak ding in an ṭum lio ah KIA le AA nih an kah hna i SAC ralkap cheukhat an thi, Captain telh in ralkap 5 a nung in an tlaih hna tiah KIA nih thawng an thanh.
September 30 zinglei sml 9:00am ah Momauk peng, Shanhton tlang ah hmunhma a khuar mi SAC IB 438, IB 437 in ralkap 10 hrawng cu Nuanhlan khuate ah riahcaw lak ding in an ṭum lio ah KIA battalion 25 le AA nih an kah hna. Kahdohnak chung ah ralkap cheukhat an thi i SAC Captain 1 telh in ralkap 5 a nung in an tlaih hna, MA Series zuun 5, pistol 1 le kuan pawl zong an lak khawh tiah theih a si.
“Shanhton tlang le Alawbon tlang pawng ah KIA nih an ralkap an samh dih cang. SAC ralkap pawl hi Shanhton tlang ah an eiawk a dih cang. KIA lei nih an phih dih hna. Cu ralkap pawl eiawk a lak ding in a ṭum lio ah KIA nih an kah hna. 5 chung ah Captain 1 aa tel. A thi mi ralkap cheukhat zong an um. Hriam pawl zong an lak khawh” tiah KIA lei thawngpetu nih Khit Thit ah a chim.
