Mone Khua Nikhat Chung Ah SAC Ralkap Voi 3 An Kah Hna I 12 Thi, 16 An I Hliam
The Chinland Post | 2023 July 7 — KNU Brigade 3 hmunhma, Bago ramṭhen, Nyaunglaybin pengkomh, Mone-Zayat lam ah a um mi Ohphyat khua le Kanyin khua ah a um mi SAC ralkap pawl cu July 3 thawk in KNLA, PDF phufonh nih voi 3 an kah hna i SAC ralkap 12 an thi, 16 an i hliam tiah theih a si.
SAC ralkap pawl riahcaw an phorhnak lam ah himnak lakpiak ding in hmai ah a kal mi SAC ralkap pawl cu Ohphyat khua pawng zinglei ah voikhat, chun ah voikhat tiah Drone in 40MM, 60MM bom an thlak hnawh hna caah SAC lei 4 an thi tiah theih a si.
July 5 zaan sml 8:00pm hrawng ah Kanyin khua sianginn hmai ah a phan mi SAC ralkap pawl cu KNLA phufonh nih hriamngan le meithal in an kah hna caah SAC ralkap 8 an thi, 7 an i hliam tiah theih a si.
Bago ramṭhen, Mone peng, Htantabin, Nyaunglaybin, Kyaukkyi, Shwegyin le Phyo peng hna zong ah SAC ralkap le mipi hriamtlai phu pawl karlak ah nifatin in kahdohnak a chuak.
July 2 zong ah Nyaunglaybin peng ah a um mi Chingchuangphyat hlei pawng ah a um mi SAC ralkap le mipi hriamtlai phu karlak ah kahdohnak a chuak i SAC ralkap 14 hrawng an thi tiah theih a si.
