Mone Peng Kahdohnak Ah SAC Ralkap 70 Leng An Thi Tiah KNLA Nih Thawng A Thanh
The Chinland Post | January 29, 2024 — Karen National Union –KNU Nyaunglaypin pengkulh, Mone peng-မုန်းမြို့နယ် kahdohnak ah SAC ralkap 70 leng an thi tiah Karen National Liberation Army (KNLA) Headquarters lei nih thawngthanhnak a tuah.
KNLA Brigade 3 kuttang um battalion 8 umnak, Mone peng Akyapinn khua lei ah SAC ralkap a ra mi cu January 22 ni Zing 5:00 am in aa thawk i Sml 12 chung kahdohnak ah SAC ralkap 72 an thi, hliamtuar mi 78 hrawng an si tiah KNLA lei nih an chim. SAC ralkap a thi mi chung in Engineer ralkap bu le palek tampi an i tel tiah an langhter. Kahdohnak ah hriamnam an lak mi cu an langhter rih lo.
Mone peng ah KNLA le tangti mipi ralkap bu hna nih December 2023 ah kahdohnak an tuah i Mone khuachung um ralkap battalion le ralkap sakhan an lak khawh i Battalion Deputy commander telh in SAC ralkap a nung in 20 leng an rak tlaih hna, SAC ralkap a thi mi an tam tiah KNU nih a rak chim.
Nyaunglaypin pengkulh telh in KNU hmunhma ah SAC nih uknak a lak hnu in SAC he kahdohnak voi 10,000 leng a chuak, SAC lei ralkap mi 10,000 leng an thi tiah KNU lei nih 2023 kum donghnak lei ah thawngthanhnak an rak tuah.
Photo- 2023 kum donghlei Mone khua kahdohnak ah SAC sin lak mi hriamnam hmanthlak
