Monkeypox zawtnak a karh tuk caah WHO nih ngandamnak lei ralrin caan (Emergency) a thanh
The Chinland Post | 2022 July 25 – Vawlei pumpi in a karh a rang tuk mi Monkeypox zawtnak dirhmun ruangah vawlei pumpi in ngandamnak lei ralrin caan (Emergency) tiah WHO nih July 23 ah a thanh.
Atulio caan hi ram khat le ram khat lonh in i chawnhnak a tam caah vawlei pumpi ram pawl nih ṭha tein an tawlrel a hauh caah atu bantuk in Emergency kan thanhnak hi a si i cubantuk zawtnak a karh mi hi a fak tuk i ruah lo piin i chawnhnak a karh tuk caah ningkhel a si lomi dirhmun a phanh ruangah mipi hna ngandamnak caah ram kip cozah nih an tawlrel a hau tiah WHO nih a chim.
“A tawinak in kan chim a si ahcun, vawlei pumpi ah a rang tuk in a karh i i chawnh dan a phunphun in an i chawn. Atulio cu i chawnh dan a sining kan theihmi a tlawmtuk rih. Cucaah vawlei pumpi ngandamnak lei ralrin caan (Emergency) kan thanhmi hi a si” tiah WHO Director Dr. Tedros Adhanom Ghebreyesus nih a chim.
Atutiang vawlei pumpi ah Monkeypox zawtnak i chawnhnak 16,016 a um i a luancia zarh chungah zawtnak i chawnhnak 4,132 a um. Ram 75 ah a karh i minung 5 an thi cang tiah a thanh.
Monkeypox zawtnak hi virus ruangah a cangmi a si i cu virus cu saram in minung ah a chawn khomi zawtnak pakhat a si. Minung le minung zong i chawnh khawhmi virus a si tiah theih a si.
