Motor Pahnak In Pa Siang Cung Uk A Thi; Motor Mongtu Van Sui Kung Tazacuai A Tong
Salai Elvis| 2018 May 29| May 28 Thantlang khuachung zanlei sang suimilam 6:30 ah Market sang, COTR biakinn lampial zawn ah motor le cycle an i pah caah Pa Siang Cung Uk (kum 18) cu a hmun ah a thi colh. Motor mongtu Van Sui Kung (kum 28) cu upadi pohmah 304 (a) ning in tazacuai a tong tiah theih a si.
An i pahlio a hmutu nutung pakhat nih, “motor hi a hmai deuh ah a kal, hnu in Cycle a ra i motor cu lonh a timh pah, laklawh pah in a um. Tlawmpal ah Cycle nih motor cu lonh pah in a hnur pah chih i a tlu i motor nih a rial chih” tiah TCP ah a chim.
Van Sui Kung cu mah ni zanlei thawk in palek nih thonginn ah an hren chung. Upadi pohmah 304 (a) ah thong kum nga chung thlak khawh a si tiah aa tial.
“Zarhhnih a rauh hnu ah Van Sui Kung cu biaceih a si te lai. Biaceih zung chung ah kaphnih chungkhar hnatlaknak in i ngaithiam hna sehlaw theih lo a si lo. Kap hnih chungkhar remnak an tuah khawh ahcun an Case a dih te ko lai” tiah Thlantlang sakhanhmu Pu Thang Cin nih TCP ah a chim.
Pa Siang Cung Uk a ruak cu Siibawi te nih phunning tein PR 3/VLSH/18 ning in zohfelnak an ngeih dih hnu ah May 29 ni ah a ruak cu vui a si. Amah cu Khualhringtlang Thinghual khuami Sianginn sang um mi a si tiah theih a si.+++
About The Author
