Motor PK Nih Dantatmi Tangka An Kut Cungah Um Ternak Nawl An Ngei Lo
Salai Elvis| 2018 May 17| Thantlang khuachungah motor PK nih minung an tlaih ning hna le an riantuan ning kongah zatlang bu ai-awh Chiarman pakhat nih zungkip fonh meeting tuahnak chungah a chuahpi mi cu Upadi bawi Lin Ko Ko nih motor PK nih an tlaih mi hna tangka cu an mah kut cungah kennak nawl an ngei lo tiah May 14 ah a chim.
“Hi kong ah an chim ka theih mi cu khuachung motor thil thlak lio te hna lam aa fianril lo caan hna a um tik ah cu lio caan ah cun an zohfel ding le minung humhimnak an ven awk a si. Tutan ah penguk zung nih zarhkhat chung nan riantuan mi hmanthlak le minung tlaih zet cazin tha tein tuah le chuahpi dingin a roh hlan ah ca a pek hna lai. Cu tikah zarhkhat chungah minung pa zeizat dah an tlaih hna i biaceih zung le upadi zung ah chuah pi an si lai tikah kan theih cang hna lai i hlen khawh a si ti lai lo. Cun motor PK hrim nih an kut cungah an tlaih mi hna tangka laknak nawl le chiahnak nawl an ngei lo. Biaceih zung tu ah i rem le phung an buar ning in tangka cawiter dingtu a si” tiah upadi bawi Lin Ko Ko nih TCP ah a chim.
Motor PK nih khuachung ah minung aa chok mi hna humhimnak pek lo in khua leng Laipawnglung ah minung bawh in an tlaih mi han kongah Thantlang zatlang bu aihawh in chairman pakhat nih May 14 zungkip meeting chungah fakpi in hi kong hi rak chim a si.
“Khua leng Laipawnglung an hngah mi cu a si deuh lo. Khauchung ah motor le cycle a tamtuk tik ah tihnung a si. Khuachung ah um in zungkai chung vial te 9 in 3 tiang hrawng rak kan um piak hna seh law minung humhimnak caah a tha deuh lai. Khauchung ah um ah cun mizapi zong kan i ralring deuh lai i mizapi sin hrim ah cawnpiak nak a tlawm tuk tikah a tubantuk in zungkip fonh meeting chungah fakngai in ka chim.” tiah CFG Director Henry Siang Bik Cung nih TCP ah a chim.
Thantlang khuachung nih 2018 kum January in April thla tiang motor cycle a tlaih mi hna zat cu; January -30, Febuary -2, March- 6, April-10 le May 2 (May ni 9 tiang cazin ning) an zapi thla li chungah minung 50 tluk lawng biaceih zungah chuah pi mi an si.+++
About The Author
