MP 36 Nih Phunghrampi Remhnak Kong Biatung Chuahpimi An Ceihmai Cang Lai
TCP-Hakha| 2019 February 4| Phunghrampi Remhnak Bawmchantu Committee sernak ding biatung chuahpimi cu thaizing (February 5) ah tuahdingmi Pyidaungsuh hluttaw tonpumhnak ah MP 36 nih an ceihmai lai. Cu chung ah Chin ramkulh in MP Pu Lal Min Thang aa tel ve tiah theih a si.
February 5 ah tuahdingmi Pyidaungsuh hluttaw tonpumhnak caanhmanning ahran an thanh chungmi ah Phunghrampi remhnak Bawmchanhtu Committee sernak ding biatung a ceihmaitu zapi hi minung 36 an si. Hi chung ah Vice President hlun U Nyan Htun, President zung in minister hlun U Soe Thein, minister hlun U Maung Myint, Bogyokgyi hlun U Hla Htay Win le Chinram in MP Pu Lal Min Thang an i tel. Minung pakhat nih minute 6 cio lawng an ceihmai lai.
Asinain, hi biatung cu ralkap palai MP hna nih upadi tuahtuanning he aa kalh an ti caah ahohmanh nih an ceihmai lai lo tiah theih a si.
Thaizing tuahding Pyidaungsuh hluttaw tonpumhnak caanhmanning ahran an thanhmi ah biatung dang ceihmai ding pakhat hmanh aa tel lo, phunghrampi remhnak ding bawmchantu committee sernak kong pakhat te lawng bak an ceih lai tiah theih a si.
A biapimi biatung a chuahpitu NLD party in Amyotha hluttaw palai U Aung Kyi Nyunt nih 2008 phunghrampi upadi remhnak hi khulrangte in tawlrelnak ding ah bawmchantu committee ser i cu committee ah party kip in Pyidaungsuh hluttaw palai pawl i tel cio ding in biatung a chuahpi.
Biatung chuahpimi cu Rangoon ramthen in MP pakhat nih dirkamh cohlannak a tuah. Asinain, ralkap palai hna nih an cohlang duh lo. Cohlan duh lonak caah an zapite in an dir dih. Cu hnu ah hluttaw speaker U T. Khun Myat nih hi biatung hi ceih awk a tlak le tlak lo mee peknak in biakhiahnak kan tuah lai a ti i mee an thlak. Meeting kaimi zapi 601 an si, biatung a cohlangtu mee 394, a cohlang duh lomi mee 17 an si. Biatung a dirkamhtu an tamdeuh caah hi biatung cu pehzulh in ramkomh hluttaw ah ceihmai than ding in bia an khiah caah February 5 ah ceihmai an timhnak hi a si.
Hi biatung an ceihmai dingmi cu 2008 phunghrampi remhnak kong biatung a si rih lo. Phunghrampi remhnak ding caah bawmchantu committee ser le ser lo ding kong ceihaminak biatung lawng a si rih. Serding in biakhiah a si ahcun bawmchantu committee an ser lai i cu committee nihcun zei bantuk pawl dah remh a herhmi an si tibantuk pehzulh in an tuante ding khi a si lai tiah theih a si.
About The Author
