MP Pi Ni Sui Lian Nih Thantlang Peng Fimcawnnak Zung A Thar Sakding Kong Hluttaw Ah A Hal

TCP-Thantlang| 2018 July 25| Thantlang peng fimcawnnak zung pe (100’x30’x24’) RCC dot hnih a thar sakpiak dingmi cu 2018-2019 tangka kum ah sak ding in aa tel le tel lo MP Pi Ni Sui Lian nih Pyithu hluttaw caanhmaan tonpumhnak ah biahalnak a tuah. 

Hi kong he pehtlai in July 24 Pyithu Hlttaw caanhman tonpumhnak ah Thantlang peng Pyithu luttaw palai Pi Ni Sui Lian nih Thantlang peng fimcawnnak zung pe (100’x30’x24’) RCC dot hnih a thar sakpiak ding cu 2018-2019 kum ah aa tel le tel lo biahalnak a tuahmi cu rampi fimcawnnak zung lutlai chang U Win Maw Tun nih a tanglei bantuk in a leh.

Thantlang peng ah 2018-2019 tangka kum chungah sianginn 13 sak dingin timhtuah nak ngeih a si cang. Cucaah Thantlang peng fimcawnnak zung pe (100’x30’x24’) RCC dot hnih a thar sakpiak ding cu 2018-2019 budget kum ah aa tel rih lo. 2019-2020 kum tangka umtu ning zohchunh hnu ah sakpiak dingin timhtuahnak ngeih a si” tiah U Win Maw Tun nih bialehnak a tuah.