Myaing kahdohnak mipi hriamtlai 7 an nunnak a liam, mipi 3 an thi, 6 nih hliam hma an tuar
The Chinland Post | 2022 April 20 – Magway ramṭhen Myaing peng le Gangaw peng ah SAC ralkap le mipi hriamtlai phu karlak ah nifatin ngawt in kahdohnak a fak i kaphnih in a thimi an tam tiah DVB nih a langhter.
Myaing peng Tegyi khua pawng, April 19 zaanlei ah kahdohnak a chuak i SAC ralkap 1 a thi, Myaing PDF nih pasalṭha 5, LPDF in pasalṭha 2, sualnak ngei lo mipi 3 an nunnak a liam i mipi 6 nih hliamhma an tuar tiah Myaing PDF thawngpetu nih DVB ah a chim.
SAC ralkap pawl cu Pyusawhtee pawl an umnak khua a simi Wetpot khua lei in Kyaukkhukyenan sakhaan lei ah thazang 50 hrawng in phu khat, Phalankaingyenanmay in Te lei ah thazang 50 hrawng in phu khat tiah kahdohnak an tuah.
Mipi hriamtlai phu lei in nunnak a pemi an tam caah SAC ralkap phu hnih karlak ah i tenh in hnu an kir lioah PDF bantuk in aa umtermi nih a auh hna i karceh in an kah hna caah pasal ṭha 7 an nunnak a liam.
Cun, SAC ralkap pawl nih Tegyi khua lei ah hriamngan in kah thlorh an kah caah mipi 3 an thi i 6 nih hliamhma an tuar tiah a chim.
Tegyi khuami pakhat nih “Kan khua ah April 19 zaanlei in meithal thawng le bom thawng pehzulh in a thang. Kan nih zong kan ṭih tuk caah himnak hmun ah kan zaam. SAC ralkap hriamngan nih a khen ruangah mipi 3 an thi i 6 nih hliamhma an tuar. A tutiang inn kan ṭin ngam lo” tiah DVB ah a chim.
Myaing peng Myanmar Oil and Gas Enterprise (MOGE) company ah hmunhma a khuarmi SAC ralkap 60 leng cu April 16 ah mipi hriamtlai phukomh hna nih an kah hna caah a thimi an tam kho i an zaam tiah theih a si.
Gangaw khua hnulei, April 18 zongah SAC ralkap le Yaw Defense Force (YDF) karlak ah kahdohnak a rak chuak.
Cu kahdohnak bawmh ding in a rak raami SAC ralkap mawṭaw cu YDF nih Sipin sang pawngah bom kan puah hnawh tiah tiah a chim.
YDF chungtel pakhat nih “Kahdohnak hi Gangaw pawng ah a si. Bawmtu ding a raami zong sipin sang ah kan kah hna. Palik 1 le ralkap 4 an thi colh, hliamhma a pumi zong an tam. Kan mah lei in hliamhma a tuarmi kan um lo” tiah a chim.
April 19 zinglei zongah Natchaung, Phetwon khua lei ah a kalmi SAC ralkap le YDF karlak ah kahdohnak a rak chuak bal.
Gangaw le Htilin hmunhma ah kahdohnak a chuak kho peng mi a si caah mipi hna nih Gangaw-Htilin lam le Htilin-Cin-Pauk lam hna zul rih lo ding in YDF nih thawng a thanh.
