Myanmar Boxing Zuamnak Ah A Hmasa Bik In Chin Ramkulh Nih Sui Medal A Co
City Hunter| 2018 June 12| Yangon ah tuahmi avoi 16nak ramkulh le ramthen huap in Myanmar nunphung boxing zuamnak ah Chin ramkulh in a hmasa bik 60 weight ah Awm Mang nih sui medal (gold) a co.
Myanmar nunphung boxing zuamnak ah Chin ramkulh aiawh in Mindat peng in minung 5 an i zuam i sui medal pakhat pin ah 71 weight ah Aung Meng nih a pathumnak laksawng darsen medal (bronze) zong an co.
Chin ramkulh aiawh in aa zuamtu hna coach a simi U Tam Mang nih, “ahlankan i timhtuahnak kan ngei. Ramkulh zaanglekcelh bawi nih tuanvo a ka pek caah mi ka khawmhsuat. Zarhkhat hrawng lawng a hrampi fimthiamnak ka chimh hna. Cu chung in zuamnak tuah hlan ah ni 10 renglo deuh tuahchunhnak (cinh) kan ngei i Laitlang in Pyin Oo Lwin ah an kal i kan va tuahchunh (cinh) than” tiah a chim.
Avoi 16nak Myanmar boxing zuamnak ah Chin ramkulh aiawhtu Mindat in aa zuami hna cu 48 weight ah Naing Zaw Ha, 60 weight ah Awm Mang, 71 weight ah Aung Meng, 48 weight ah Saw Thura Htun le 48 weight nu ah Mah Naing Awi an si.
Myanmar nunphung boxing zuamnak ah Chin ramkulh aiawh in 2016 le 2017 kum zong an rak i zuam i ngun medal (silver) tiang lawng an rak co khawh. Asinain tukum ah a hmasa bik sui medal (gold) an co khawh cang.
Coach U Tam Mang nih, “A hlan ahcun hi bantuk boxing thongh ahhin Chinmi an i zuam bal lo. Hi bantuk zuamnak taktak tiang an phak hlan le a caan phak hlan ah an sungh lengmang. Atu cu Chin ramkulh nih a hmasa bik kar kan hlang kho cang. Hmailei ahcun Chin ramkulh caah tampi ruahchannak a um cang. Chin mizapi zong nih tha kan pek cio ding ka duh” tiah a chim.
Ref: Chin World, Photo; Aung Lay
About The Author
