Myanmar Idol Ah Ni Len Asiloah Ahodah A Rak Kir Than Lai?
City Hunter| 2018 July 26| Tuzan ah Myanmar Idol top 4 zuamnak an tuah than cang lai. Top finalist a phanmi le a tla ciami minung 7 chung in minung pakhat cu “Pantene Wild Card for your Idol” timi tlangtar in mizapi nih duh bikmi (vote tambik hmutu) minung pakhat cu Myanmar Idol ah a rak kir than cang lai. Top finalist chung in Ni Len Par Mawi asiloah ahodah Myanmar Idol ah a rak kir than lai ti na zumh?
Top Finalist chung in a tla ciami minung 7 cu; Ni Len, Zaw Gyi, May Madi, Naw Jas, Swan Pyae Aung, Nan Shwe Yi le Pyae Phyo an si. Anmah 7 chung in minung pakhat kha Myanmar Idol ah a rak kir than lai, Myanmar Idol donhhleicung ah hlasaknak a ngei kho than lai.
July 20 zan in July 21 zanlei suimilam 6:00pm tiang MNTV Myanmar Idol Application in mizapi nih minung 7 lakah duhbikmi vote pek an si. Myanmar Idol lei tuanvo ngeitu nih vote tambik hmutu zeitik ah kan thanh lai timi zapi sin ah thawng an thanhcia rih lo caah zeitik an thanh lai hngalh khawh a si lo. Asinain tuzan Top 4 zuamnak ah an thanh lai i hlasaknak zong a ngei colh ve kho tiah theih a si.
Mi tamdeuh nih an zumhmi hna cu; Ni Len, Zaw Gyi le May Madi pathum lakah pakhat chingchang an si lai tiah an ruahdamh cio hna. Social media cheukhat ahcun Zaw Gyi nih a ngah tiah facebook status ah a tialtu zong an um cang. Asinain, atu tiang cu Myanmar Idol lei nih zeihmanh an thanh rih lo.
Tuzan Top 4 ah aa zuam dingmi hna cu; Phyo Myat Aung, Chan Mae Mg Cho, Ngwe Zin Hline le Nay Khant Min Thit an si.
Tukum Myanmar Idol winner laksawng cu ks. 50 million (sing 500) pek pin ah album chuahpiak a si lai. 2016 kum (season-1) ah Myanmar Idol cotu cu Saw lah Htaw Wah a si. 2017 kum season-2 ah Thar Nge a si.
Ngaknu Nilen Par Mawi cu Engineering of Electronic Communication (EC) in Yangon ah sianginn a dih mi a si i Make Me Beautiful timi tamhmoih lei zuamnak zongah Myanmar Ram Pumpi huap in aa zuam i a thiambik pathum thimmi tiang aa telmi a si.
Amah hi kum 23 a si i Senthang peng Dongva khuami Pu Hrang Vung le Pi Thluai Iang @Thote nih an ngeihmi fanu hniang bik a si.
Nilen Par Mawi hi Eain Mat Sone Ya ah top 3 i a rak i telmi Nicholas Dawt Kam Sang far nu a si. Hi bantuk in fim cawnnak lei zongah sii-inn zungmawi thiamnak lei in siseh hlasaknak lei zong in siseh bochanmi a si i miphun dang hna lakah Chin miphun mithmai a kan ngeihtertu ngaknu pakhat a si. +++
About The Author
