Myanmar Idol Season 3 Hlasak Zuamnak Ah Lai Ngaknu Ni Len Par Mawi Aa Tel
Salai Ngun San Aung| 2018 May 16| Myanmar ram pumpi huap in tuahmi hlasak zuamnak Myanmar Idol Season 3 ah Lai ngaknu Ni Len Par Mawi @Nu Mawi cu Audition (fingrilh rilh thimnak) a awng cang i zuamnak chung lut ding ah aa tel cang tiah kan theih.
“February 20-22 ah khan Audition timi hneksaknak an rak kan tuah. Cu hneksaknak a lonh khomi lawng kha zuamnak taktak ah i tel khawh a si. Kawlram chung in minung 10,000 leng kan i zuam i cu chung in atu Audition a lonh kho i zuamnak ah a lut ding hi zeizat set kan si ka hngal lo nain 100 leng pi kan si lai. Kei ka number cu 09099 a si” tiah Nu Mawi nih TCP ah a chim.
Nu Mawi hi Galaxy Stars nih tuahmi Myanmar ram pumpi hlasak zuamnak zong ah 2017 ah khan aa zuam i minung 25,000 hrawng lakah top 26 tiang a rak phan balmi a si. Loreal Paris nih tuanmi Make Me Beautiful timi Myanmar rampi huap tamh zuamnak zongah final tiang a phan i pathumnak laksawng a hmumi a si.
Tutan ah Myanmar Idol zuamnak i aa telnak kong ah hitihin The Chinland Post ah a chim.
“Keimah hi ka ngakchiat tein hlasak ka huam. Asinain Sianginn kai pah cun zuamnak te pawl luh hi ka nu le ka pa nih an ka sianh lo. Voikhat hnih cu kaa zuam bal cang nain ka duhning tluk ka phan kho lo. Cun halsak thiam minthang pakhat si zong ka duh i tamhnak lei ka tuah pah ko bu ah hlasak cu ka ngol siang lo i tu zong kaa zuam than nak hi a si.”
Cun Myanmar Idol ah Winner si khi cu va um rih ko sehlaw a thiambik 10 (top-10) chung i tel hmanh ah khin hmailei thanchonak caah lam a tam tuk cang. Cucaah a hmasabik ah cun top 10 i tel ding khi saduhthah a si i top 10 tiang phak khawh a si le khi hnu khin chim awk a um than te hnga tiah Nu Mawi nih cun a biapeh ah a chim.
Myanmar Idol ah mark petu hna cu Yan Aung, Myo Kyawh Myaing, Tin Za Maw le Myanmar Pyi Thein Dan an si.
Ngaknu Ni Len Par Mawi cu Yangon ah Electronic Communication (EC) major in Bachelor of Engineering (BE) a dih cang mi a si i a tu lio ah Yangon Hlaing Thiri ah a um. Make Me Beautiful timi tamh zuamnak ah pathumnak laksawng a lak hnu in tu hi NILENsMakeup timi tamhnak a tuah pah cuahmah mi a si.
About The Author
