Myanmar Idol Theatre Round 1nk In Chinmi Pathum An Kai chap

The Chinland Post| October 12, 2019| Myanmar Idol Season 4 in Golden Ticket a ngahmi hna chung in Theatre Round 1nk zuamnak cu aluanciami October 11 zan ah zuamnak an tuah than i Chin miphun in Salai Yaw Kee, Esther Dawt Chin Sung le Bejamin Sum pathum cu an kai chap tiah thawng kan theih.

Tutan zuamnak cu Group in an then hna i Golden Ticket a ngahmi chung in zatceo nak tam deuh cu Round dang kai khawh lo in Judge (tlangtlatu) nih an thlak hna. Hi zuamnak ah Esther Dawt Chin Sung cu  Adele i hla minthang ‘When we were young’ timi in aa zuam i Salai Yaw Kee le Benjamin Sum cu Kawlhla in an i zuam ve.

Theatre Round 2 zuamnak cu a ralaimi October 18 zan ah tuah a si lai i, Theatre Round 1 in a kaimi dihlak a phu then in Group Song saknak in an i zuam lai. Hi Group song in zuamnak ah zatceo tluk an tla rih lai tiah kan theih. Top Ten phan hlan tiang cu Judge nih Mark pek in an kaiter hna lai i Top Ten an phak hnu cun mipi nih thimfung thlaknak in Final tiang kai a si lai.

Tutan Season 4 zuamnak cu Judege ah Aung Ko Laat (Rap hlasa minthang J. Me a pa), hlasak minthang Tin Zaw Maw le Phyu Phyu Kyaw Thein hna nih an tuan.

“Tutan zuamnak ah Winner (teinak a cotu) cu laksawng ah tangka in sing 500 Ks pek a si lai. Cun Moon Myanmar Media nih album pakhat zong kan chuahpiak chih lai” tiah Moon Myanmar Media in Executive Director nih Mizzima Media ah a chim.

“Myanmar Idol laksawng cotu ding ah a thiam taktak mi mipi nih kan thimpiak hna seh ti kan duh. Kan i tinhning ahcun Myanmar Idol in laksawng a cotu hi American Idol nih sawm in vawleicung zapi hmai ah zuamter khawh zong hi a si,” tiah a biapeh ah a chim chap.

Myanmar Idol Season 4 zuamnak cu Taung Gyi, Mandalay, Taung Ngo, Pha-aan le Rangoon khuapi hna in minung thimnak an tuah tiah kan theih.++ Ref: Mizzima

 

Leave a Commnet

%d bloggers like this: