Myanmar-India Ramri Gate Hna Ah Phungningte In Chuahluh Khawh A Si Cang Lai
Tio-Zokhuathar (Gate)
TCP-Online| 2018 August 7| Myanmar-India ramri gate pahnih a simi Sagaing ramthen Tamu peng le Chin ramkulh Rih peng hna in, phungningte chuahluh khawh si dingin thaizing (August 8) ni ah kap hnih cozah lei nih hunnak an tuah cang lai.
Cuti phungningte in chuahluh khawhnak cu Tamu ah August 8 ni zinglei sml.8 ah tuah a si lai i cu caan thiam ah Rih zong ah kap hnih cozah hna nih tuah a si lai ti peng kip lutlai hna sinin theih a si.
“Hun a si ni thok in phungning in chuahluh khawh a si colh lai” tiah Rih khuabawi Pu Cin Lam Khai nih a chim.
Tamu-Mawre, Rih-Zohkhuathar in phungning te gate hunnak an tuah hnuah Kawlram mi ca ah India Embassy nih e-Visa le India mi ca Kawlram Embassy nih e-Visa hna chuahpiak an si cang lai i mah e-Visa he hin phungningte in chuahluh khawh zong a si cang lai. Mah e-Visa cu ramdangmi ca zongah chuahpiak khawh an si ai ti zong rianngeitu cozah lei nih an chim.
e-Visa chuahpiak pinah ramri ah a ummi khua hna nih cun ram khat le ram khat kar i Kilometre 16 aa hlatnak hmun ah zalongte in tlonlen khawh a si cang lai i nawl hal a si ahcun voi khat hal ah ni 13 in ni 15 tiang zong zan riah khawh si cang lai ti kan theih.
Ref; The Voice
