Myanmar-India Ramri Luhchuahnak (Border Pass) In Ni 14 Tiang Zan Riah Khawh A Si Cang

Vahui |2018 August 10| Chin ramkulh Rihkhawdar peng um Tio Gate simi Myanmar-India ramri luhchuahnak cu August 8 ni khan hunnak an tuah cang i Border Pass (BP) system he a tam bik ni 14 tiang chuahluh khawh le zan zong phungning in riah khawh a si cang ti kan theih.

Hi phungningte in luhchuah khawhnak le Border Pass (BP) System hna cu Chin ramkulh Minister Salai Lian Luai le Mizoram Commerce Minister H. Rohlunna hna nih hunnak an tuah.

Chin ramkulh Minister Salai Lian Luai le Mizoram Commerce Minister H. Rohlunna

Tuan deuh ah Border Pass system hi a um rih lo caah theihthiamnak in luh le chuak a rak si. Myanmar-India ramhnih hnatlaknak ngeih in minthut ciami (Agreement on Land Border Crossing with Myanmar) cu hngalh fiang than ding ah tubantuk hunnak an tuah hi a si.

“Tuan ah Border Pass System hi a um rih lo caah ramri luh le chuah hi theihthiamnak kan rak tuah, tu cu Border pass System tein katpia (ကပ္ ျပား) tuahpiak an si cang lai. Border Pass (BP) in cun zan 15 ,16, Temporary Border Pass (TBP) in cun ni 7, 6 zaan riah a ngah cang lai” tiah Rihkhuadar thawngthanh zung ni Pu Lawn Pah Law nih a chim.

Border Pass pinah hin Kawlram Embassy nih chuahpiakmi e-Visa aa tlaihmi zong nih phung ning in luhchuah khawh a si cang i ramdangmi (Myanmar le India rammi si lomi) zong nih e-Visa he ramri ah luhchuah khawh a si cang.

Myanmar-India ramri Border Pass hunnak cu no (1) le (2) ramri Gate simi Tamu le Rihkhawdar khua ah August ni 8 ni khan hmunkhat te ah hunnak an tuah.

Ref; Chin World

Na ruahning rak langhter ve.. (Leave a comment)

%d bloggers like this: