Myanmar Le Russia Zinan Cawknak Ah Ramhnih Tangka Hmang Kho Ding In Timhtuahnak An Ngei
Salai Mangpau | September 12, 2023 — Myanmar le Russia ramhnih karlak zinan cawknak ah Myanmar tangka kyat, Russia tangka Rubel hmang kho ding in ramhnih hnatlaknak cu a rauh hlan ah minthutnak tuah a si lai tiah SAC ramdang sipuazi pehtlainak Union Minister for Ministry of Transport and Communication Minister Dr Kan Zaw nih a chim.
Russia ram Vladivostok khua ah The 8th Eastern Economic Forum 2023 tonpumhnak ah aa tel mi Dr Kan Zaw nih forum lenglei a um lio ah Russia hrambunh Sputnik Media ah a chim tiah RFA Burmese nih a ṭial.
Tu lio SAC nih Russia ram zinan a cawknak ah Tuluk Yuan tangka a hmannak kong zong Dr Kan Zaw nih a chim chip.
A luan cia 2022 Eastern Economic forum ah SAC bawizik Min Aung Hlaing nih Russia ram in zinan cawk a sinak kong Sputnik media ah a rak chim bal.
Tu kum Eastern Economic forum hi Russia ram, Vladivostok khua ah September 10 in 13 tiang ni 4 chung an tuah lai.
Mah forum ah SAC Ministry of Industry Minister Dr. Charlie Than zong nih Forum tuah lio ah ramhnih tangka hmannak ramhnih hnatlaknak minthut ding in timhtuahnak a um tiah a chim.
