Myanmar Ministry Zung Pahnih Lutlai Pawl US Nih An Ram Luhnak Visa An Phih Hna
Salai Ngun San Aung| 2018 July 11| US ram chungah ningcang loin lut i zulhphung a buarmi pawl Myanmar ah kir ternak ding rian ah Myanmar cozah nih tuanvo a lak lo caah cu kong i tuanvo ngei ministry zung pahnih lutlai pawl le an chungkhar kum 21 tang paoh US ram luhnak visa an phih hna tiah theih a si.
“2018 July 9 thawk in Yangon i U.S. palai zung nih B1 le B2 timi ram khat le ram khat i tlawnkai nak visa cu tu lio i (MOLIP) timi riantuannak, mi lutchuak tlangtlatu le milurelnak zung le (HOMA) timi Pyitheyee ministry zung lutlai upa pawl le an chungkhar minung kum 21 cung lei paoh cu an phih chung cang hna” tiah thawng an thanh.
Myanmar nih U.S. um Myanmar rammi kir ter ding mi pawl kong ah U.S. cozah he bawm in rian a tuan lo ahcun visa phihnak hi aa peh thluahmah rih ko lai tiah a si.
US ram chung ah phung ning loin a rak lut i an ram zulhphung pawl a buartu ram cheukhat minung pawl kha anmah le ram cio ah kuat dingin U.S. cozah nih a tawl rel. Cu bantuk in kuat ding ahcun an rat nak ram nih khan a herhmi catlap (Passport) ti bantuk pawl kha tuah piak a herh ve. U.S. Cozah nih cu bantuk kuat ding in bia a khiah mi hna kha an ratnak ram nih thlaruk chungah an ram kirnak ca a herhmi catlap vialte tlangtlak a herh. Thla ruk leng cu hren lo ding timi mumai U.S. nih a ngeih. Cu thlaruk chung ahcun Myanmar cozah lei in tuanvo ngeitu Pyitheyee le Immigration lei nih pakhat hmanh an tlangtlak lo lengah kan ceih lio ko, kan tawlrel ko tibantuk hmanh thawngthanh mi an ngeih lo tikah U.S. Cozah nih tu bantuk in cu zung lutlai le an chungkhar minung pawl ram ram chung luhnak visa an phih hna hi a si.
September thla lio ah khan Papua New Guinea, Sierra Leonne, Eritrea le Cambodia ram pawl zong hi bantuk ruangah U.S. nih tuanvo ngei zung lutlai le an chungkhar pawl U.S. ram chung luhnak visa a rak phih cang hna. July thla ah Myanmar le Vietnam in lutlai pawl visa a phih hna hi a si ve. Tu tiang ah U.S. cozah he i bawm in an ram mi kirter thannak rian an tuan lo ruangah Guinea, Sierra Leone, Eritrea le Cambodia cu a phih rih ko hna.
Hi bantuk in U.S. nih Myanmar ramkomh i Pyitheyee le Immigration ramkomh huap lutlai pawl visa a phihmi hna hi Rohingya buainak le ramkhel buaibainak dang dang zeihmanh aa tel lo tiah kan theih.
Ref: VOA, BBC
About The Author
