Myanmar ralbawi pawl hi ICC nih a ziizut kho hna lai maw?
The Chinland Post | 2022 March 11 – Rohingya cungah Myanmar ralbawi pawl nih nuhrin covo an buar leng ah hramhram in uknak lak a si hnu ah mipi cungah a buarmi sualnak pawl caah Myanmar ralbawi pawl hi International Court of Crime (ICC) nih a ziizut khawhding in aa zuam tiah former political prisoners, nuhrin covo kong he pehtlai in a cawlcangmi pawl le National Unity Government rian ngeitu pawl nih an chim.
Assistance Association for Political Prisoners (AAPP) le tlangcung nihrin covo phu telhmi mipi phu 116 nih Myanmar ralbawi pawl hi ICC nih a ziizutpiak dingin March 7 ah United Nation Human Rights Council sin ah caa an kuat.
2017 ah Rohingya cungah sual a buar mi le hramhram in uknak lak a si hnu ah mipi cungah sualnak a buar chap timi tette langhter a si ahcun 2019 liote in ICC ah ceihmi Rohingya case he pehtlai in Myanmar ralbawi pawl hi a ziizut khawh an si kho men tiah Sweden ram ah ummi Human Rights sihni U Aung Htoo nih a ruahdamh.
“Rakhine ram, Rohingya cungah a buar lio ah ralkap chung silole Battalion chungah hramhram in uknak a lak tikah mipi pawl hrem le thah a si ahcun prosecutor nih a chimphuan khawh. Mah ralkap nih hin Rohingya pawl a thah bantuk in uknak zong hramhram in a lak i mipi pawl a thah hna timi tette an langhter khawh a si ahcun 2019 lio ah rak ceihmi ICC case in tei khawh a si”.
ICC nih Myanmar ralbawi pawl a ziizut khawhnak hnga ding caah cun mipi cung ah sualnak buar ding in ralkap bawi pawl nih zeitin dah an fial hna timi tette fiang tein langhter khawh hrimhrim a herh tiah U Aung Htoo nih a chim.
Ramkomh Kawlram ah ralkap nih zeitik hmanh ah nuhrin covo a buar khawh ti lonak hnga khamnak ding caah cun ICC nih Myanmar ralbawi pawl a ziizut khawhnak hnga a biapi tuk tiah AAPP in chimnak nawl a ngeitu pakhat nih RFA ah a chim.
“Chan tamtuk ralkap nih nihrin covo a buarmi he pehtlai in ramchung, ramleng nih zei bantuk a ziizutnak hmanh a tuah kho lo. An nih cu sualphawtnak in luat khawhnak nawl an ngei. Cucaah, a tu bantuk sualnak an buar rihmi hi a si. Hmailei ah mah bantuk a can ti lonak hnga ruat chih buin a ziizutnak tuah khawhding in kan hal hi a si”.
March 7 ah Human Rights Council sin ah kuatmi ca chungah ramkomh kawlram chung sualnak vialte caah UN nih tuah khawhnak nawl a pekmi biaceihnak ser in sualnak a ngeimi pawl tazacuai khawhnak lam vialte kawl le raamkomh kawlram singing hi ICC ah ṭhial khawhding cu UN Security Council nih biakhiahnak pakhat ngei kho hna seh tiah an hal.
A luancia 2017 lio ah kawl ralkap nih ram le hmunhma zohfelnak an ngeih caah Rohingya Muslim a tlawmbik 600,000 in 1000,000 hrawng cu ramri lonh in Bangladesh ram ah an zaam.
Mah kong hi ceih khawhmi case si dingah ICC pre-trial biaceihzung No.3 nih 2019 November ah nawl a chuah.
Myanmar ram cu Rome Statue ah min thumi a si lo nain Rohingya ralzaam pawl a cohlangtu Bangladesh ram nih min a thut caah International Law ningin ICC nih mah case hi a biaceihnak nawl a ngei tiah vawlei pi sining a theitu sihni pawl nuhrin covo kong he pehtlai in a cawlcangtu pawl nih an chim.
Britain ram ah a ummi Myanmar Rohingya phu Chairman U Htun Khin nih Rohingya cungah sualnak a buarmi ralbawi pawl nih hramhram in uknak an lak i ram pumpi mipi cungah sualnak a buar tiah RFA ah a chim.
“Kawl ralkap nih kan mah Rohingya cu 2017 thokin rulrulhranghrang in an kan tuah. Kan miphun ning in an kan thah. Cun, 2021 February thla thokin a rulhrang khunmi sualnak a buar. 2017 lio ah ramdang nih a ziuzutnak rak tuah kho hna sehlaw hramhram in uknak lak hi fawi tein a rak cang hnga lo. A tulio caan ah pakhat khat kan tuah lo a si ahcun mah ralkap hi a fak deuhmi sualnak a buar rih lai”.
NUG zong nih Rohingya kong le hramhram in uknak lak a simi kong ah ralbawi pawl ICC nih taza a cuai khawhnak hnga an zuam liopi a si.
A luancia July thla ah NUG nih Myanmar ram cu ICC i biacheihnak nawl kan cohlan ko timi cathanh cu biacheih zung i registration officer sin ah an kuat.
NUG Minister of Human Rights U Aung Myo Min nih a fak tukmi sualnak le nuhrin covo buar a sinak cungah ralbawi pawl nih rian an ngei timi tette ṭha kan ngei tiah RFA ah a chim.
“A tulio sualnak vialte le tuahsernak vialte cungah rian a ngeitu cu Min Aung Hlaing a si ko. Zeiruang kan ti a si ahcun a mah nih nawl a chuah ruangah a si. A mah nih nawl a chuah lo zongah mipi pawl thah,nu le hngakchia tiang thah hi cu tinhmi ngei tein a tuah hrammi a si. Mah bantuk thil pawl hi a hlan liopi ah tlangcung miphun sin ah a rak um bantuk in Rakhine ram ah a ummi Rohingya pawl sin zongah buar a si. Pau dothlennak hnu ah Sagaing ramṭhen hi a temhing bik a si. Mah bantuk hmunhma hna ah sual a buarnak tette ṭha tein kan ngei”.
NUG cathanh cu ICC nih ka kut cungah a phan ko tiah August thla ah bialehnak a um ko nain a hmailei tuahding thil pawl he pehtlai in zeihmanh chimhmi a um rih lo tiah U Aung Myo Min nih a chim.
ICC nih Myanmar sining he pehtlai in 2019 November 14 ah a thanhmi cu Myanmar ralkap bawi pawl nih sualnak a buar tak ko timi tette ṭha tein nan khawmh khawh a si ahcun rian a ngeimi ralbawi pawl cu biaceihzung hmai ah auh silole tlaihkhawhnak warrant halnak nawl a um tiah a langhter.
Ref: RFA
About The Author
