Myanmar Ralkap Bawizik Senior General Min Aung Hlaing Hi 2020 Ah President A Si Kho: U Ye Htuat

City Hunter| 2018 April 10| Myanmar ralkap bawizik Bogyokehmugyi (Senior General) Min Aung Hlaing hi 2020 kum ah President caah chuahpi a si kho tiah President U Thein Sein cozah chan i Thawngthanhnak Lei Minister rian a rak tuanmi U Ye Htuat nih a cabia ah a langhter.

Ralkap lutlai hlun zong a simi U Ye Htuat nih Singapore hrambunh ISEAS caah a tialmi cabia ah atu lio ralkap bawizik rian a tuan liomi Bogyokehmugyi Min Aung Hlaing hi Daw Aung San Suu Kyi nakin kum 10 tluk a no deuh i amah kuttang Bogyoke hna zong nih amah thutdan hi chan an timh tiah a ti.

Atu phunghrampi ning in hluttaw chung ah ralkap palai phu in Vice President pakhat chuahpi a si.  A ralaimi 2020 thimnak caah NLD nih Daw Aung San Suu Kyi hnu ah a fimthiammi mino hruaitu thar an um ko tiah mizapi nih an hmuhsak ko lai. Cu hruaitu thar nihcun mizapi thatnak ding zatlang le sipuazi thanchonak a tuanchuah khawh lai tiah lemsoinak an tuah lai tiah a tial.

President thar ah thimmi U Win Myint a hlawhtling lai maw, tling lai lo dah timi kong cu rampi ruahnak petu rian a tlaimi Daw Aung San Suu Kyi nih zeitluk in dah riantuannak nawl a pek timi cung ah aa hngat tiah U Ye Htuat nihcun a ruahdamh.

President thar U Win Myint hi huapkau ngai in ramrian kong hmuhtonnak a ngeimi a si I hluttaw term hnih tiang aa telmi le kum 20 renglo NLD ah rian a tuan cangmi a si. Cu vialte a hmuhtonmi nih cozah chungtel pawl hna cu thazaang thawng ngai in a pehtlaih khawh hna lai tiah U Ye Htuat nih ‘A new Generation leader for Myanmar’s National League for Democracy’ timi cabia ah a langhter.
Ref: BBC Burmese

Na ruahning rak langhter ve.. (Leave a comment)

%d bloggers like this: