Myanmar Ralzaam Harnak Tongmi A Rauh Hlan Cohlan Ding In Timhcia Kan Si Cang; Myanmar Cozah
Salai Cung| 2018 April 20| Rakhine ramkulh chuahtak in Bangladesh ram ah a zaammi Myanmar ralzaam hna cu rianrangte in cohlan ding ah timhcia kan si cang tiah Myanmar cozah tuanvo ngeitu hna nih April 19 ah an chim.
Myanmar ramkomh ministry zung in zatlang nunchanhnak le hmunhma pekthannak minister Dr. Win Myat Aye hruaimi phu cu Bangladesh ram an va phan i an khuallam he pehtlai in April 19, Yangon NRPC ah Myanmar cozah tuanvo ngeitu hna nih thawngfianternak an tuahnak ah atu bantuk in an chim hi a si.
“Kannih cu timhcia kan si cang. Cohlan hna ding zong kan duh. An rak um cianak hmunte ah himte le limhang ngeite in khuasaknak nawl an ngei kho lai. Anmah duhningte rianrang te in an ra kho ko lai” tiah ramkomh cozah zung in minister U Taung Tun nih a chim.
Hi thawngfianternak ah rampi ruahnak petu zung in minister U Kyaw Tint Shwe, ramkomh cozah zung in minister U Taung Tun, Dr. Win Myat Aye, Rakhine rammi bawmhnak, hmunhma peknak le thanchonak lei (UEHRD) tawlreltu lutlai zik Professor Dr. Aung Htun Thet telh in Bangladesh khuallam ah aa telmi hna nih fianternak an tuah i ramkip palai hna le media tampi an i tel kho.
Myanmar ram palai hna cu Bangladesh ram um Bengali umnak ralzaam sakhaan pahnih ah April 11-13 tiang kan va kal. Ralzaam pawl Myanmar ram kirnak ding a nuarhnak kong hngalh duh ah kanmah pumpak kan va kal hi a si tiah Dr. Win Myat Aye nih a chim.
“Ralzaam pawl rianrangte in an rak kir khawhlonak a ruang cu rikhiahmi pungsan ningte in an tial, an tuah lo ruang ah a si. Cun, an kuatmi pungsang zong ningcangte a si lo caah chekhlat than a har tuk. Cu ruang ahcun hiti a nuarhnak hi a si” tiah a chimchih.
Cu tikah rikhiahmi pungsan (form) ningte in an tiallonak a ruang cu Bangladesh Pyihtayzi minister le ramleng minister he ceihmainak kan ngeih khawh caah atu kan tonmi zuamcawhnak hna cu lonh in ramhnih i bawmhchanhnak ding lamthar kan hmuh cang tiah Dr. Win Myat Aye nih a chim.
“Tial dingmi form hna cu ramhnih ceihmai in hnatlakmi pungsan, hmanthlak, minthut le kutnamh aa tel lo. Myanmar leikap in zeihmanh kuat than a hau lo. Kan kuat thanmi hna form cu rikhiahmi ning in a si lo ti kha Bangladesh ramleng minister nih a hngalh cang caah cu ningte in cun nan kuat lai tiah a minung pawl kha a chimh hna. Myanmar cozah sin zong ah rianrang te in kan rak kuat colh lai tiah a chim.
Rammi sinak (NVC) a ngeimi paoh cu zalong te umkal khawhnak an tuah i lah-wah-kah zung nih pungsan-4 tuah in tuanvo ngeitu hna sin ah thawng an thanh lai i umkal khawhnak an ngei cang lai tiah Dr. Win Myat Aye nih a chim.
“Rikhiahmi zorter ding, zalong tein umkal khawhnak ngeih ding. Zeicahtiah a tlawnbik NVC aa tlaihmi hna cu Freedom Of Movement ngah ding in kan tawlrel. A tlizaammi rak kir thannak ding ah Myanmar rammi si a herh lo nain Rakhine ramkulh ah an rak thutdir balnak a fekmi tette an ngeih belte a herh tiah Rampi Ruahnak Petu zung in minister U Kyaw Tint Shwe nih a chim.
A rak kir thanmi hna cu Bengali asiloah Rohingya in cohlan si lo in Rakhine ramkulh ah a ummi Muslim tiah hman a si kong U Kyaw Tint Shwe nih a fianter. NVC rian ah a soktu hna cu atu lio ti-se upadi ning in tawlrel an si lai i rammi si awk aa tlakmi hna zong thla 5 chung ah rammi sinak card an hmu lai tiah Dr. Win Myat Aye nih a chim.
Ref: 7Day Daily News
About The Author
