Myanmar ram ah bom ruangah hliamhma a tuarmi thla thum chungah zaa leng an si
The Chinland Post | 2022 May 19 – Hramhram in uknak lak a sihnu ah hriamtlaih buainak a chuakmi Myanmar ram ah bom ruangah a nunnak a liammi le hliamhma a tuarmi a zaa leng an um cang tiah UNICEF nih a thanh.
“Hmanhmi bom pawl hi ṭhihphaihnak pakhat ah a karh kho men. 2022 thla hramthok thla 3 ah mipi hliamhma a tuarmi le a nunnak a liammi 100 leng an si cang tiah UNICEF nih a chim” tiah New York khua UN Headquarter nih May 18 Press Conference ah Stephane Dujartic nih a chim.
Myanmar ram ah bawmhnak kong he pehtlai in buainak a zual chin khomi a si i mipi hna harnak an tong chin tiah a chim.
Hramhram in uknak lak a sihnu ah a chuakmi hriamtlaih buainak le himnak a um lomi dirhmun ruangah inn le lo a zaamtak mi 600,000 leng telh in vawlei cung ramkip ah ralzaam 950,000 leng an um tiah a chim.
Caan tlawmpal cun fur a tlak cang lai caah ralzaam camp le a si khawhnak in a ummi ralzaam pawl ca funding le bawmhnak a zaatawk in a um lomi hi harnak taktak a si tiah a chim.
Ralzaam hna caah bawmhchanhnak kan i zuam chih ko nain tangka lei le kalumnak kong he pehtlai in harnak a um tiah a biachimnak ah a telh chih.
Myanmar ram 2022 kumkhat caah funding USD $ 826 millions hal a si ko nain 8% lawng kan hmuh rih tiah UN biachimnak nawl a ngeitu nih a chim.
About The Author
