Myanmar ram ah Covid-19 mizaw thar 20 leng an hmuh, Singapore ah Covid-19 zawtnak in kum 4 hngakchia a thi

The Chinland Post | 2022 July 19 – Myanmar ram, nikhat chungah Covid-19 mizaw thar 20 leng kan hmuh chap tiah SAC kuttang ngandamnak zung nih July 18 ah a thanh.

A luancia sml 24 chungah Laboratory sample 6,175 check a si i mizaw thar 22 hmuh a si caah zawtnak rungrul 0.36 % a um tiah a langhter.

Covid-19 zawtnak in a thi chapmi an um lo caah Covid-19 in a thi cangmi minung 19,434 an si tiah a thanh.

Myanmar ram pumpi in Covid-19 zawtnak aa chawnhmi 613,838 an um i zawtnak in a dam cangmi 592,744 an si tiah cathanh ah a telh chih.

Cun a luancia ni tlawmpal ah Omicron mizaw thar hmuh a si i Omicron zawtnak BA.4 le BA.5 a ngeimi hi ramdang in Myanmar ram ah a rak phan ṭhanmi Myanmar rammi an si i riikhiahmi nicaan chungah adang tein thlopbul an si. An ngamdam ngai cang tiah a ṭial.

Asinain a cunglei thanhmi hi CDM sizung pawl, CDM Laboratory ah check mi aa tel lo i SAC kuttang ralkap sizung lawngah check mi a si caah zawtnak i chawnhnak le a thimi he pehtlai in a fiangmi cazin theih a si lo.

NUG kuttang ngandamnak zung nih cun Covid-19 zawtnak thar hi a zarh chung te ah vawlei pumpi ning in a karh tiah WHO cathanh charhchan in thawng a thanh ve.

Southeast Asian chung zongah Covid-19 zawtnak 20% a karh i a thimi 16% tiang a kai. Mizaw thar hmuhnak a karh lio caan ah Covid-19 zawtnak B.A.5 le B.A.4 a ngeimi an tam tiah a thanh.

Cun, Singapore ram zongah Covid-19 zawtnak in kum 4 hngakchia pakhat a thi i Covid-19 zawtnak chawnh ruangah kum 12 tang hngakchia an thih a voihnihnak a si tiah Singapore ram ngandamnak zung nih a thanh.

A luancia June 27 ah kum 1 le cheu hngakcia pakhat cu Covid-19 ruangah thluakphin le adang thlidawpnak lam zawtnak virus phun 2 ruangah a thi i ahlan ah a ngan a rak dam komi hngakchia a si tiah Singapore ram ngandamnak zung a peh.

Cucaah mipi hna nih Covid-19 khamhnak sii i chunh hrimhrim ding le Covid-19 he pehtlai in zulhpung vialte pehzulh rih ding a biapi tiah NUG nih forhfialnak a tuah.

Na ruahning rak langhter ve.. (Leave a comment)

%d bloggers like this: