Myanmar ram ah eidin harnak ton a si

The Chinland Post | 2022 June 16 – Khuacaan a hman lo ruang, Ukraine ral a thawh ruangah vawlei pi minung 49 million nih eidin har dawh a si i Myanmar ram mipi 13.2 million nih a tu tein eidin i zat lonak an tong colh tiah Food and Agriculture Organization (FAO) nih a chim. Eidin a harmi zat hi vawlei pumpi minung cheu 3 ah cheu 1 zat a si caah ram hmete pakhat caah cun a har tuk lai.

Hramhram thiltuahnak a dih hlei lo i Sipuazi harnak ton a si lengah khuacaan a hman lo, mipi pawl zong i ṭhial leng a si lengah Covid-19 rai a um ruang le adang a ruang tampi ruangah rampi eidin kong a hnoksak dih tiah FAO nih June 8 ah a thanh.

Irrawaddy tiva kam hmunhma hna cu ramlak a um lo, tlang a lo, ralkap nih an rak tuk hna ahcun zaamnak um lo in rili lawng a um caah leithluan khawhmi dirhmun ah a um. Asinain, Sagaing le Magway ramṭhen PDF hna hloh dih ding in SAC nih vanlei in kahdohnak a tuah lawng si loin khua kip an khangh caah eidin a chuahtu pawl lei an ṭuan kho ti lo.

FAO phu le World Food Program nih tukum June in September tiang vawlei pi hmunhma 20 ah mangṭam a tlun lai caah bawmhnak pek ding tiah tuan tein ralrin peknak caah Hunger Hotspots tiah mangṭam a tlunnak ding hmunhma pawl report an chuah. Report chungah Africa ram pawl mangṭam an ton dan ṭha tein a langhter.

Cazin 20 chungah Myanmar ram aa tel lo nain ngiatthlaimi ram ah North Korea he aa tel. A tubantuk ngiatthlaimi ram thil sinning ṭha tein kan ngah kho rih lo nain a naih tein zoh an hau tiah langhter a si i Myanmar mipi chungin 25% nih eidin ngeih lo buainak an tong cang tiah a langhter.

Na ruahning rak langhter ve.. (Leave a comment)

%d bloggers like this: